Қазақстандық академик Асқар Жұмаділдаев математиканы шемішкеше шағатын балаларға теңдеу жасырып, теңдеуді дұрыс шешкен адамға $1000 АҚШ долларын беретінін мәлім етті, деп хабарлайды BNews.kz.
Ақпан айында мектеп оқушыларына арналған «Алгорифм» журналының биылғы бірінші нөмірі жарық көрген болатын. Бұл басылымның бас редакторы әрі құрылтайшысы – Айман Өтешова.
Екі айда бір шығатын жаңа журналда академик Асқар Жұмаділдаевтың 60 жылдығына орай сұхбаты және 35 «Алтын белгі» шығарған Оңтүстік Қазақстан облысындағы Мақтаарал ауданының Жетісай қаласындағы Б.Момышұлы атындағы мектеп-гимназиясы туралы мақала берілген. Онда аталған мектеп директоры Өмірхан Қозыбақтың қызықты оқыту әдістемелері мен академик Асқар Жұмаділдаевтың есеп-жұмбағы, ерлікке пара-пар еңбектері жан-жақты ашылған.
Сонымен қоса, физика және математика тақырыптарына арналған қызықты мақалалар бар. Сүйсінетін жайт – осы басылымда академик Асқар Жұмаділдаев математиканы шемішкеше шағатын балаларға теңдеу жасырып отыр. Ғалымның журналға берген сұхбатында мынадай жолдар бар.
– Балаларға қандай қызықты сұрағыңыз бар?
– Сұрақ көп. Мысалы х!+1=y2. Осы теңдеудің бүтін шешімдерін табу керек. Екі шешімін айтып берейін. х=4, y=5, x! =24. 24+1=25. Тағы бір шешімі, x=5, y=11, 5!+1=120+1=121. Үшінші шешімі бар, балалар соны тапса деймін. Төртінші шешімі бар ма, жоқ па? Төртінші шешімін тапқан балаға $1000 сыйақы беремін. Егер менің 60 жылдық мерейтойыма орай төртінші шешімді табатын талантты бала табылса, онда маған үлкен сыйлық болар еді. Осы есептің жауабын бірінші болып шығарған оқушы «Алгорифм» журналы редакциясына жазылу түбіртегімен қоса хабарлассын, депті академик.
bnews.kz