Утиль алымы жаңа ереже бойынша төленеді
Kolesa.kz редакциясы биыл мамырдың басында шенділерге утилизациялық алым төлеу ережесіндегі қайшылық туралы хабарлаған. Екі айға жуық уақыттан кейін ҚР Экология министрлігі құжатқа өзгеріс енгізу туралы Үкімет қаулысының жобасын дайындады, - деп хабарлайды Alashainasy.kz тілшісі.
Енді импорттаушы Қазақстан аумағында сатылатын өнім үшін утиль алымын төлейді деген норма ережеден алынады. Жаңа ережеде Қазақстанға тауар (автокөлікті қамтиды) әкелетін азамат оны өзі пайдаланса да, сатса да алым төлеуге міндетті болады деп жазылады.
Сонда бұған дейін Қазақстанға өзі міну үшін көлік әкелген азаматтар ақшасын қайтарып алса бола ма? Негізі олар сол кезде өз әрекетін сотта дәлелдеп, мемлекетті утиль алымын алмауға мәжбүр етсе болар еді.
Сондай-ақ енді ережеде «утиль алымының мөлшері қоршаған ортаны қорғау органы бекіткен утилизациялық алымды есептеу әдістемесі негізінде өтініш берген кезде қолданыста болған тариф пен коэффициент бойынша бекітіледі», деп жазылады.
Екі ай бұрын осы жағдай азаматтардың наразылығын тудырған еді. Оның көбі шетелден көлік әкеліп, алым мөлшері 50 %-ға азаяды деп тіркетпей отырған. Бірақ «Жасыл Даму» белгіленген ережеге сүйеніп, жаңа тариф бекітілгенге дейін елге келген көлікке утиль алымы бұрынғы мөлшермен төленетінін айтты. Бұл мәселе министрлік араласқаннан кейін ғана шешілді.
Ережедегі тағы бір өзгеріс — электромобиль мен халықаралық тасымалда қолданылатын ершікті тартқыш үшін утиль алым төлеуге өтініш беру қажет болады. Негізі олар алымнан босатылған. Ережені әзірлеушілердің айтуынша импорттаушы машинаны тіркету үшін алым төленгені туралы анықтама қажет. Ал анықтама өтініш негізінде беріледі. Аталған құжатта көліктің утиль алымнан босатылғаны көрсетіледі.
