Мейрам күндеріне жалақы қалай есептелінеді?

Медициналық қызметкерлер демалыс және мейрам күндері тәуліктік кезекшілікке тұрғанда олардың жалақысы қалай есептелуі тиіс?
Жайнагүл ЕРКІНБЕКОВА, Жамбыл облысы
Еңбекті нормалау және еңбекке ақы төлеу басқармасының сарапшы мама­нының мәліметіне қарағанда, Қазақстан Республикасы Еңбек кодексінің 128-ба­бына сәйкес мереке және демалыс күн­дерiндегi жұмысқа қызметкердiң күндiк (сағаттық) ставкасы негiзге алына отырып, кемiнде екi есе мөлшерде ақы төлеу жүргiзiледi.
Ауысымдық жұмыс кезiнде қызметкерге барлық нақты жұмыс атқарған сағаттарына төлем жүргізіледі.
Егер қызметкердің ауысымы мереке күніне келсе, оған жоғарыда көрсетілген қосымша ақы төленеді.
Сонымен бірге үздiксiз өндiрiстерде немесе өндiрiстiк-техникалық жағдайлар бойынша немесе халыққа ұдайы үздiксiз қызмет ету қажеттiгi салдарынан демалыс күндерi жұмысты тоқтату мүмкiн болмай­тын өндiрiстерде iстейтiн қызметкерлерге демалыс күндерi жұмыс берушiнiң қызметкерлер өкiлдерiмен келiсе отырып қабылданған актiлерiнде бекiтiлген ауысымдық кестеге сәйкес, қызметкерлерге аптаның әр күндерi кезекпен берiледi.
Осыған орай, қызметкердің ауысымы демалыс күнге (мысалы, сенбі, жексенбі) сәй­кес келген жағдайда оған демалыс күні жұмыс атқарғаны үшін қосымша ақы төлен­бейді.
Қызметкердің сағаттық ставкасы оның лауазымдық жалақысын ағымдағы айдағы жұмыс сағаттарының санына бөлу арқылы айқындалады.
Сонымен бірге Денсаулық сақтау ұйым­дарының медицина қызметкер­лерiнiң кезекшiлiгiн ұйымдастыру және еңбекақы төлеу ережесi Қазақстан Респуб­ликасы Ден­саулық сақтау министрінің 2010 жылғы 18 тамыздағы №652 бұйры­ғымен бекітілген.