Еуропадағы инфляция, соғыс және марка үшін маңызды нарық саналатын Ресейге көлік жеткізудің тоқтауы Rolls-Royce саудасына кері әсерін тигізе алған жоқ, - деп хабарлайды Alashainasy.kz тілшісі Кolesa.kz-ке сілтеме жасап.
118 жылдық тарихы бар автоөндіруші былтыр 6021 машина сатты. Салыстыру үшін айтсақ, 2021 жылы — 5586, ал 2011 жылы 3538 «роллс-ройс» иесін тапқан.
Марка АҚШ-та ең көп өтті, екінші орында Қытай тұр. Ұлыбритания мен Германияда да сатылым рекордтық деңгейге жетті. Азия-Тынық мұхит аймағы елдері мен Таяу Шығыста айтарлықтай өсім байқалды, аталған өңірде орташа бағасы жарты миллион доллардан түспейтін Bespoke желісінің арнайы түрленімдері сұранысқа ие.
Rolls-Royce Cullinan
Rolls-Royce әр модельдің қанша данасы өткенін хабарлаған жоқ, тек ең танымалы Cullinan кроссовері екені белгілі, одан кейінгі орында Ghost седаны тұр. Бұлар марканың ең арзан өнімдері, бағасы — 330–340 мың доллар, ал флагман Phantom седанының бағасы 450 мыңнан асады.
Клиенттер компанияның алғашқы электромобилі Spectre купесін де жылы қабылдады, оған зауыт жоспарлағаннан көп тапсырыс түсті. Алғаш болып алдын ала төлем жасаған азаматтар машинасын 2023 жылдың төртінші тоқсанында алады.