Мәскеудегі зауытта «Москвич» маркалы машиналар ірі торапты әдіспен құрастырыла бастады, - деп хабарлайды Alashainasy.kz тілшісі Кolesa.kz-ке сілтеме жасап.
Бұл туралы бірқатар ресейлік БАҚ хабарлады.
Конвейерге тұрған алғашқы модель — «Москвич 3» кроссовері, оған Қазақстанда JAC JS4 деп аталатын қытайлық машина негіз болғаны белгілі. Бірақ компания басшылары ұзақ уақыт бойы «Москвич» пен JAC-тың еш қатысы жоқ екенін айтып жүрді.
ТАСС ақпаратына сенсек, жаңа «москвич» биыл желтоқсанда сатылымға шығады. Бірақ өзге БАҚ машина 2023 жылы наурызда сатыла бастайтынын хабарлады.
Айта кетейік, «Москвич 3» 1.6 литрлік атмосфералы және 1.5 литрлік турбомотормен ұсынылады. Бірінші қозғалтқыш тек механикамен, ал екіншісі вариатормен де жұмыс істейді. Машина алдыңғы жетекті болуы мүмкін. Бағасы әлі белгісіз. Жақында көліктің электрлі түрленімі де шығады, оған арналған көлік құралының типін мақұлдау құжаты да дайын.