Omoda C5 ЕЭО нарығына шығу үшін құжат алды
Росстандарт базасында Omoda C5 кроссоверіне арналған көлік құралының типін мақұлдау құжатын жарияланды, - деп хабарлайды Alashainasy.kz тілшісі Кolesa.kz-ке сілтеме жасап.
Онда машина Ресейде бір ғана күштік құрылыммен (147 ат күші мен 210 Нм момент беретін 1.5 литрлік турбомотор) шығатыны жазылған. Агрегат вариатормен жұмыс істейді. Көлік алдыңғы жетекті. АИ-92 маркалы бензин құюға болады.
Бағасы мен комплектациясы туралы ақпарат жоқ. Бірақ көлікте климат-бақылау, кілтсіз ашу жүйесі, жүксалғыш есігінің электр жетегі, электронды көмекшілердің толық жинағы, люк, сондай-ақ орындық және рөл жылытқыш сияқты опциялар болады.
Omoda C5 Ресейде биыл күз аяғында сатыла бастайды. Осы модельден кейін бренд топтамасы тағы бір кроссовер және седанмен толығады. Болашақта Қазақстанда да Omoda автосалондары ашылуы мүмкін.
Omoda қытайлық Chery концернінің жаңа суббренді, оның Ресей нарығына шығатыны маусымда белгілі болды. C5 моделі өз отанында Chery Omoda 5 деген атпен танымал. Марка жол талғамайтын көліктің прототипін 2021 жылы күзде Гуанчжоу автосалонында таныстырған, ал өндірісі биыл жыл басында басталды. Omoda 5 Қытайда 1.6 литрлік турбомотормен және гибрид нұсқада сатылады. Сондай-ақ толық жетекті түрін таңдауға мүмкіндік бар.
