Шілдеден бастап тағы алты трасса ақылы болады

Индустрия және инфрақұрылымдық даму министрлігі бірінші «б», екінші және үшінші дәрежелі жолдарды ақылы ету туралы бірнеше заң жобасын дайындады, - деп хабарлайды Alashainasy.kz тілшісі Кolesa.kz-ке сілтеме жасап.

Құжатқа сәйкес жүк көліктері мен автобустар мына аймақтарда жолақы төлейді:

* Ұзындығы 56 км болатын Орал— РФ шекарасы (Самараға қарай);

* Ұзындығы 198 км 210 м болатын Павлодар — РФ шекарасы (Омбыға қарай);

* Ұзындығы 99 км болатын Орал — РФ шекарасы (Саратовқа қарай);

* Ұзындығы 448 км болатын Павлодар — Семей — Қалбатау;

* Ұзындығы 169 км болатын Көкшетау — Петропавл;

* Ұзындығы 85 км болатын Бейнеу — Ақжігіт.

Тас жолдағы жолақы мөлшері айлық есептік көрсеткішке (2023 жылы 3450 теңге) және автомобильдің жүк көтергіштігі мен автобустағы жолаушы орнына байланысты шақырымына 5-25 теңгеден болады.

Жүргізушілер ақылы жолдармен жүру үшін 1-5 АЕК бір айлық және 12-60 АЕК тұратын жылдық абонемент сатып ала алады.

Бұйрық жобасы маусымның аяғына дейін талқыға түседі. Соған қарағанда ақылы жолдар жүйесі шілдеде күшіне енуі мүмкін.

Бұл жолдарда шлагбаум болмайды. Ақшаны қолма-қол алмайды, оны сіз автомобиль нөмірі тіркелген жеке шот, Kolesa.kz және басқа мобильді қосымшалар арқылы төлей аласыз.