ҚР ІІМ Көліктегі ІІД жеке құрамы 15-18 желтоқсан күндері «Қазақстан Республикасының Тәуелсіздік күнін» мерекелеу кезінде құқықтық тәртіп пен қауіпсіздікті қамтамасыз ету мақсатында қызмет өткерудің күшейтілген тәртібіне көшеді, деп хабарлайды Baq.kz ақпарат агенттігі.
Шараға ведомстваның барлық күштері мен құрылымдары толықтай жұмылдырылады.
Департамент бастығының орынбасары полиция полковнигі Талғат Өтетілеуов мереке күндері көлік сақшыларымен әуе және темір жол көліктерін пайдаланатын жолаушылардың қауіпсіздігін қамтамасыз етудің күшейтілетінін айтты. Оның айтуынша, департаменттің 800-ге тарта қызметкері еліміздің әуе және темір жол вокзалдарындағы қоғамдық тәртіпті қамтамасыз етпек.
Ол қылмыстардың алдын алу, сондай-ақ алаяқтықпен, бопсалаумен және өзгенің мүлкін ұрлаумен айналысатын тұлғаларды анықтау және жолын кесу бойынша да арнайы рейдтік және профилактикалық іс-шаралар ұйымдастырылатынын да сөз етті.
Қосымша құрылған жедел-тергеу топтары қылмыстарды «ізін суытпай» ашу үшін оқиға орын алған жерге шұғыл түрде жететін болады. Бұдан бөлек, департаменттің қызмет көрсету аумағында қызметтік-іздестіру иттерімен патрульдеу үшін кинологиялық орталық қызметкерлері де жұмылдырылатын болады.
Полиция полковнигінің айтуынша, қазіргі уақытта Астана-1 және Астана «Нұрлы жол» темір жол вокзалдарындағы қоғамдық тәртіпті жан-жақты қадағалау үшін 600-ден аса бейнебақылау камерасы жұмыс істеп тұр. Бейнебақылау камералары ғимараттардың іші мен сыртына орналастырылған.