Жас сарбаздар әскери ант қабылдады

Қазақстан Республикасы ІІМ Ішкі әскерлерінің қатарына шақырылған жас сарбаздар бүгінде жас жауынгер курсынан өтіп, алды жауынгерлік қызметке кіріскелі отыр. Өткен сенбіде Ішкі әскерлердің генерал-майор Әлібек Серәлиев қолбасшылық ететін Алматы құрамасына қарасты №5571, 5572 әскери бөлімдерінің 400-ден астам жас сарбазы салтанатты жағдайда әскери ант қабылдады.  
Әскери қызметшінің өмірінде бір-ақ рет болатын осы рәсімді тамашалауға, жас жауынгерлер мен олардың ата-аналарын, әс­кери бөлімдер командирлерін құттықтау үшін ант қабылдау рәсімі өтетін 28 пан­филовшы атындағы саябаққа Қазақстан Рес­публикасы Парламенті Мәжілісінің де­пу­таты, кешегі Ауған соғысының ардагері, қо­ғам қайраткері Бақытбек Смағұл, «Нұр Отан» ХДП Алматы филиалы төр­аға­сының бірінші орынбасары Кенжехан Ма­ты­жанов, Ішкі әскер ардагерлері келді. Әс­кери жарғы бойынша Алматы құрамасы мен оған қарасты әскери бөлімдердің жа­уын­герлік туы ортаға шығарылып, тиісті пәр­мен берілген соң, жас жауынгерлерден ант қабылдау шарасы басталып та кетті. Осы ретте жылдағы дәстүр бойынша әс­ке­ри бөлімдердің жауынгерлік туымен қоса, Ұлы Отан соғысына Қазақстаннан аттанған Панфилов дивизиясының және соның құрамындағы полктердің де жауынгерлік тулары көпшілік назарына ұсынылды. Ант қа­былдаған жас сарбаздар қатарында спорт­­тағы жолын ішкі әскермен байла­ныс­тыр­ғысы келген тоғыз спортшының бол­ғанын да атай кекен артық болмас. Олар­дың ішінде халықаралық деңгейдегі спорт ше­берлері Ислам Бозбаев, Даниял Гад­жиев, Еркебұлан Қосаев аз күндерден соң Англияда өтетін олимпиадалық ойындарға қатысатынын ескерсек, Ішкі әскерлердің қалың бұқара арасында қандай беделге ие екенін оңай бағамдайсыз. Әскери ант қабылдау салтанатының ресми бөлігінен соң, жиналған жұртшылық құрмет қа­ра­уылы ротасы мен «Континент» әскери-па­триоттық клубы мүшелерінің өнерін та­машалады. Арнайы шақырылған қо­нақ­тар сөз алып, ант қабылдап әскер қатарына қо­сылған жас сарбаздар мен олардың ата-аналарын құттықтады. Ішкі әскерлер Ал­маты құрамасының қолбасшылығы әскери бө­лімдер қызметін қалың жұртшылыққа жет­кізіп, әскери қызметті насихаттауға атса­лысып жүрген ардагерлер мен бас­па­сөз өкілдеріне сый-сияпаттар жасады.