Жас конструктордан – жаңа қондырғы

Батысқазақстандық 8-сынып оқушысы Нұркен Медет ұстазы­мен бірге биогаз өндіретін қондырғы ойлап тапты.
Ауылдағы қора-қопсыдан шығып, іріп-шіріп жататын көңді кәдеге асыруды ойлап жүретін оқушы биылғы ақпанда респуб­ликалық экологиялық бизнес жобаға қа­тысуды ұйғарған. Әрине, үлкен байқауға қатысу – ұмтылыс, сынақ деген сөз. Сөйтіп, аталған байқаудың «Қалдықсыз өмір сүруді үйренейік» аталымына Н.Медеттің «Қалдық – биогаз» атты еңбегі жіберілді. Көп кешікпей ауылға шәкірттің бұл еңбегі 100 мың теңгенің грантын ұтып алғаны туралы ақжолтай хабар жетті. Оның биогаз қондырғысы арқылы жұмыс жасайтын жылыжайының құрылысы, мұның өнім шығарумен қатар, мектептегі ұл-қыздар үшін еңбекке баулудағы маңызы, сани­тарлық мәдениетті қалыптастырудағы орны, басқа да дәлелдемелері сарапшы­лардың көңілінен шығыпты. 3х3 көлемін­дегі жылыжайда қияр, қызанақ секілді дақылдармен бірге гүл өсіріледі. Төселетін шірінді, шикізат шұңқыры, биогаз шлан­гасы, артық газды жинайтын каме­ра, жағылатын ошақ – бәрінің есебі бар.
1 тон­­­на құрғақ органикалық заттардан ан­аэробты қайта өңдеу кезінде қандай көлемде биогаз алынатыны жөнінде де алдын ала шотқа қағылған. Ферментация (органикалық заттың шіруі) нәтижесінде газ тәріздес өнімді белгілі уақыт ара­лығында қандай көлемде алуға болады, бұл да қағазға түсірілген. Енді көп кешікпей Нұркен жасаған қондырғыдан қуат алатын жылыжай алғашқы өнімін бермек.