Түркістан облысының полицейлері аккумулятор ұрлаған күдіктілерді анықтады
Шардара аудандық полиция бөліміне жергілікті тұрғын арызданды. Жәбірленушінің айтуынша, оның Шардара қаласы көшелерінің бірінде тұрған "Ауди"маркалы автокөлігінен белгісіз біреулер аккумуляторын ұрлап кеткен.
Оқиға орнына шыққан жедел-тергеу тобы мен криминалистер куәлардан жауап алып, ауланы аралап, мәліметтер базасы бойынша тексеру жүргізді.
Жедел-іздестіру іс-шараларының нәтижесінде полицейлер күдіктілерді анықтап, қылмыстың "ізін суытпай" ашты. Автоұрылар Шардара қаласының екі тұрғыны болып шықты.
Қазіргі уақытта осы жайт бойынша Қазақстан Республикасы Қылмыстық кодексінің 188-бабының 1-бөлігі (Ұрлық) бойынша сотқа дейінгі тергеу амалдары жүргізілуде. Оқиғаның толық мән-жайы мен сезіктілердің басқа да осыған ұқсас қылмыстарға қатыстылығы анықталуда.
Түркістан облысы ПД баспасөз қызметі
