Шымкентте колледж жатақханасында бірінші курс студентінің өліміне себепкер болғандар сотталды
Шымкентте колледж жатақханасында қайтыс болған студент соққыдан көз жұмған. Бүгін кәмелетке толмағандардың істері жөніндегі мамандандырылған ауданаралық сотында жатақханадағы өлімге қатысты іске нүкте қойылды. Бұл туралы Azattyq Rýhy astanatv-ға сілтеме жасап хабарлайды.
Қылмыстық істі қараған сот төрағасы екі жасөспірімге 6 жыл 8 ай мерзімге бас бостандығынан айыру жазасын тағайындады. Судья Дәурен Сайхановтың дерегінше, олардың бірі марқұмды темекі шеккені үшін тәртіпке шақырмақ болған көрінеді. Содан екі жігіт бірінен соң бірі кеуде тұсынан екі рет соққы берген, содан кейін марқұм өзін жайсыз сезініпті. Жедел жәрдем келгенше жан тапсырған. «Бұл абайсызда өлімге алып келген жағдай екені ескерілді» деді судья.
«Сот ескерді кәмелетке толмағанын, біріншіден. Екіншіден, жәбірленуші тараппен кешірім алып, татуласты, марқұм баланың анасымен. Сол ҚК 55 баптың 2 бөлігін қолдана отырып негізгі жазадан төмен жаза тағайындалды. Бірақ бас бостандығынан айыру жазасы тағайындалды - 6 жыл 8 айға. Негізі қылмыстық кодекстің 106 бабы 3-ші бөлігінде жазаны өтеу 8 жылдан басталады», - деді Шымкент қ. Кәмелетке толмағандарыдң істері жөніндегі мамандандырылған ауданаралық сотының төрағасы Дәурен Сайханов.
Үкім әлі заңды күшіне енген жоқ. Сот төрағасының мәліметінше, марқұмның ата-анасы кінәлі тарапқа кешірім бергенмен атпалдай азаматтың өлімі оларды жазадан құтқармайды. Сондай-ақ, колледж тарапынан түсіндіру жұмыстарының жүргізілмегені де назардан тыс қалмады.
