Сағадат Нұрмағанбетов 85 жасқа толды

Кеше Қазақстан Республикасының тұңғыш қорғаныс министрі, Халық қаһарманы, армия генералы Сағадат Нұрмағанбетов 85 жасқа келді. Соған орай Алматыдағы 28 гвардияшы-панфиловшылар паркінде салтанатты жиын өтті. Бар өмірін әскери қызметке арнаған Сағадат Қожахметұлы мен ардагер генералдар бастап келген қонақтар мәңгілік алауға гүл қойып, Ұлы Отан соғысында қаза тапқандарды бір сәт еске алды. Өз кезегінде еліміздің қорғаныс саласындағы оқу орындарының курсанттары әскери шеру өткізіп, генералға құрмет көрсетті.
Салтанатты жиыннан кейін мерейтой­ға арналған мерекелік кеш ұйымдастырыл­ды. Онда әскери институт курсанттары мен қызметкерлері әнмен шашу шашып, қо­нақ­тар Халық қаһарманына арналған жы­лы лебіздерін білдірді.
Өмір жолында С.Нұрмағанбетов 60-тан астам медальмен марапатталған. Оны тек біздің ел азаматтары емес, басқа одақ­тас мемлекеттердің барлығы ардақ тұтады. Қазақстан тұңғыш қорғаныс ми­нистрі Ресейдің «Достық», Украинаның «Богдан Хмельницкий» және «Құрмет», Польшаның «Алтын крест» сияқты орден­де­рімен марапатталған. Оның соғыс та­қырыбына жазған мақала, естеліктері кейінгі буынды отаншылдыққа үйретуге үлкен септігін тигізуде.
Кеште С.Нұрмағанбетовтiң өмірі мен ерлік істерін баяндаған бейнекөріністер көрсетілді. Оны әскери институттардың кур­санттары мен офицерлері мерейтойға арнайы дайындаған екен. Өз кезегінде ҚР Парламенті Сенаты төрағасының оры­н­басары Мұхамбет Көпеев сена­тор­лардың құттықтауын жеткізіп, той иесінің иығына қазақ салты бойынша шапан жапты. «Сіз­дің ерліктеріңізді ұрпақ еш уақытта ұмытпайды. Сіз Отан, адамзат алдында үлкен өнеге көрсеттіңіз. Сіздей батыр тұл­ғасы бар елдің намысы ешқашан мұ­қал­майды», – деді ол.