Қоғамдық көлікте тегін жүре алатындардың тізімі кеңейді
Осы жылдың қаңтар айынан бастап елордадағы қоғамдық көліктерде тегін жүретін азаматтардың санатын кеңейттік, деп жазды бүгін өзінің Facebook парақшасында елорда әкімі Жеңіс Қасымбек.
«Бүгін №1 коммуналдық автобус паркінің қызметімен таныстым. Бұл автопарк жұмысы қаланың жетпіске жуық бағытын қамтиды, мыңнан астам жүргізуші еңбек етеді.
Субсидиялар есебінен азаматтардың жеңілдетілген санаттары қоғамдық көлікте тегін қатынайды. Сол сияқты осы жылдың қаңтар айынан бастап тегін қатынайтын азаматтардың санатын кеңейттік. Осыған дейін қалада кәмелетке толмаған тұрғындардың бәрі тегін жүретін еді»,-дейді елорда әкімі.
Сондай-ақ оның сөзінше, қала тұрғындарының саны өсіп келе жатқанын, сондай-ақ жаңа көшелердің ашылғанын ескерер болсақ, қосымша автобустарды іске қосу қажет екенін жазды.
«Биыл желіге тағы 500 автобус (оның ішінде жеке инвестициялар есебінен де бар) шығаруды жоспарлап отырмыз. Сол сияқты жол-көлік желісін дамытуға, яғни көшелерді, көпірлерді жөндеу мен салуға, жаңа жолдарды ашуға және т.б. назар аударуды тапсырдым»,-деп мәлімдеді Астана әкімі.
