Ұлыстың ұлы күні қарсаңында Алматыда қазақ блогшылары бас қосып, І құрылтайын өткізді. Тұңғыш рет өткізілген шараға Қазақстанның әр өңірі мен Қытай, Моңғолия, Германия, Франциядан ат арылтып келген 150-ден астам блогшы қатысты.
Блогшылардың қатарында ҚР Парламенті мәжілісінің депутаттары, саясаткерлер, журналистер, ІТ мамандары бар. Екі күн бойы өткен басқосуда жаңа медиа, блог жүргізу, дамыту тақырыптарымен қатар, «Интернеттегі авторлық құқық», «Блог арқылы табыс табу», «Сайттарды дамыту», сайттар мен блог жұмысына ұялы телефон, бейнекамера, фотоаппараттарды қолдана отырып, жылдам ақпарат тарату, қазақ сайттарын дамыту тақырыптары талқыланды. Блогшылардың жаңа жобалары көпшілік назарына ұсынылды. Сонымен қатар оларға Еуропадан келген белгілі мультимедия маманы Дин Кокстың шеберлік дәрісін өткізіп, жылдам ақпарат тарату жолдарын үйретті. Тұңғыш құрылтай аясында өткен тағы бір тұңғыш блогшылар байқауында жылдың ең үздік блогшылары анықталды. Дауыс беру нәтижесі бойынша «Ең көп жаңаланатын блог» аталымы бойынша блогшы, журналист Өркен Кенжебектің «Оrkenegro» блогы, «Ең көп талқыланатын блог» аталымында Дінмұхаммед Зиядиннің «Қисық» атты блогы, «Ең пайдалы тақырыптық блог» аталымында Эльвира Нұрбаеваның «Аспаздық» блогы, «Ең үздік ақпараттық блог» аталымында блогшы, журналист Асхат Еркімбайдың «Өрімтал» блогы, «Ең үздік ақпараттық-технологиялық блог» аталымында журналист, блогшы Ербол Азанбектің «autokaz» блогы, «Ең үздік саяси-әлеуметтік блог» «Алаш айнасы» газетінің тілшісі, журналист, блогшы Бүркіт Нұрасылдың «akiyk» блогы, «Ең сауатты блог» аталымы бойынша Ерлан Оспанның блогы үздік аталды. Сонымен қатар Моңғолияда тұратын кішкентай қандасымыз Лашын «Ең жас блогшы» ретінде марапатқа ие болды. Ал «ең үздік оқырман» болып, қызылордалық блогшы Асқар Базарбаев танылды. Үздік блогшыларға шараның демеушілері «Nokia» компаниясы ұялы телефон сыйға тартса, «Қазақтелеком» АҚ бір жылға тегін «Мегалайн» қызметін ұсынды, сонымен қатар НР компаниясы түрлі-түсті принтер мен нетбук сыйлады. Сонымен қатар құрылтай барысында старт-ап байқауы өткізіліп, үш үздік жоба анықталды. «Болашақ» бағдарламасы бойынша Германияда оқитын студент Сағын Қалдыбековтің «Ана мен бала» сайты, Талғат Байназаровтың «Geogebra» жобасы, Ербол Серікбайдың «termin.kz» сайты, моңғолиялық қандасымыз Өмірбек Қабайдың «kazlife.com» сайты үздік деп танылып Kcell/GSM Қазақстан компаниясы тарапынан 100 мың теңге мен «Қазақтелеком» АҚ тарапынан тегін хостингке ие болды. Ұйымдастырушылардың айтуынша, шара дәстүрлі түрде өтіп тұрады.
Асхат ЕРКІМБАЙ, құрылтайдың үйлестірушісі, блогшы, журналист:
– Биылғы құрылтайдың басты мақсаты – блогшылардың бір-бірімен танысып, өз ойларын ортаға салып, жобаларын таныстыруы, сондай-ақ үздік блогшыларды анықтап, оларға дем беру болатын. Бұл тұрғыда құрылтай өз мақсатына жетті. 150-ге жуық блогшы қатысып, өз жобаларын таныстырды, өзекті мәселелерді талқылады. Арнайы маманның шеберлік сабағын тыңдады. Сонымен қатар биылғы жылдың ең үздік блогтарын анықтап, марапатталды. Үш жобаға 100 мың теңге сыйақы, тегін хостинг берілді. Бұл жобалар жақында қазақ сайттарының қатарына қосылуы тиіс. Блогшылардың басқосуын дәстүрлі түрде ұйымдастырып тұрмақпыз. Алдағы мақсат – шетелдегі ІТ саласының мамандары, блогшылар, журналистердің басын қосу, бір-бірімен пікір, тәжірибе алмасуына жағдай жасау.
Естеріңізге сала кетейік, қазақ блогшыларының тұңғыш басқосуы наурыздың 19-ы күні Алматыда басталған болатын. Шараны ҚМЭБИ, Kcell, «Қазақтелеком», Nokia, HP, Mega Ice компанияларының қолдауымен «Мінбер», «MediaLab», «MediaNet», «Ас клуб» журналистік ұйымдары ұйымдастырған.