Қазақстандықтар 3G желісін пайдалана бастады

Ақпараттық технология саласының соңғы жаңалықтарын қалт жібермейтін қазақстандықтар үшін жа­ғымды жаңалық! Бүгіннен бастап еліміздің қос ірі қаласында 3G байланыс желісі жүзеге асырыла бастайды. Қазақстандағы телекоммуникация сала­сының қарқынды дамуын тағы бір мәрте айғақтайтын жаңа технологияның іске қо­сылуына еліміздегі ірі бай­ланыс операторы GSM Қазақстан/Kcell компаниясы мұрындық болып отыр.
Ұялы байланыс стандартының жаңа қы­рын ашатын үшінші буын желісінің мүм­кін­діктері жайлы елімізде айтылып жат­қа­нына аз болған жоқ. Деректер алмасу бойынша қызметтер мен сервистерді пай­да­лану сапасын жақсартып қана қой­май, ғаламторға қосылу жылдамдығын да артты­ратын 3G құралы әсіресе электронды пошта, онлайн ойындар, файл қосым­ша­ла­рымен жұмыс істеуде уақытты тиімді пай­далануға көп ықпал етеді. Әзірше Алма­ты мен Астана қалаларында тара­ты­латын 3G желісі 90 базалық стансыдан тұрады. Биылғы жылы компания желісін кеңейтуге, оның ішінде, үшінші буын жаб­ды­ғын орнатуға 150 миллион АҚШ дол­ла­ры көлемінде инвестиция жұмсады. Ин­тернет-пакеттерді сатып алған абоненттер үшін деректерді беру тарифі 1 Мб үшін 2,3 теңге мен 11,8 теңге аралығын құрайды. Сол сияқты абоненттердің бейне қоңырау қолдану мүмкіндігі бар. 2011 жылғы қаң­тар­дың 10-ына дейін өтетін акцияның ұсынысы бойынша оның құны абоненттің тарифтік жоспарына сәйкес, әдеттегі дауыс­тық қоңыраудың бағасына сай ке­леді. Қаңтардың 10-ынан кейін Kcell, Aсtiv, Vegaline абоненттері үшін бейне қоңырау құны минутына 25 теңге шамасында бола­ды. Оператор 3G желісінде мәліметтер жет­кізу жылдамдығын секундына 21,1 Мбитке дейінгі деңгейде белгілеуді көздеп отыр. Алайда 3G стандартын ұстанатын көптеген құрылғылар секундына 2 Мбит жылдамдығында жұмыс істейтінін айтқан компания мамандары, іс жүзіндегі жыл­дам­дық тұтынушы қондырғысының техни­ка­лық мүмкіндіктеріне байланысты екенін жеткізді.
«Аталмыш желінің желтоқсанның 1-і күні іске қосылуы Қазақстан үшін аса ма­ңыз­ды тарихи оқиға саналатын ЕҚЫҰ сам­ми­тіне қатысушы шетелдік қонақтарды әлемдік стандарттарға сай келетін жоғары сапа­лы байланыспен қамтамасыз ету ба­ғы­тында қолға алынды», – дейді GSM Қазақстан/Kcell компаниясының бас атқа­ру­шы директоры Вейсел Арал.
Вейсел АРАЛ, GSM Қазақстан/Kcell ком­па­ниясының бас атқарушы дирек­торы:
– Үшінші буын желісін іске қос­қа­ны­мызға қуаныштымыз. 3G байланыс желісінің компания қызметін пайда­ла­натын тұтынушылар ғана емес, ел Үкі­меті мен өзге де құзырлы ұйымдар үшін де септігі тиетініне сенім мол. Біз өз тара­пымыздан абоненттерді сапалы бай­ланыспен қамтамасыз етіп қана қой­май, олардың ғаламторды сенімді әрі жоғары жылдамдықпен қолдануы үшін бар күш-жігерімізді саламыз.
Елі­міздің саяси және халықаралық өміріндегі екі аса маңызды оқиғаның – ЕҚЫҰ саммиті мен VII қысқы Азия ойын­да­рының ресми байланыс операторы үшін­ші буын ұялы байланыс желісін рес­пуб­лика көлемінде 2011 жылы толық іске қосуды жоспарлап отыр. Ол үшін атқа­ры­луы тиіс шаралар алдағы қаңтар айында қол­ға алынады.