Республика бойынша 1 миллионнан астам адамның мемлекет алдында қарызы 30,7 млрд теңгені құрайды. Қарыздың 26,8 млрд теңгесі қарыздың негізгі сомасы болып отыр. Қалған 3,8 млрд теңге өсімпұл есептелген, деп хабарлайды Stan.kz ақпарат агенттігі ҚР ҚМ Мемлекеттік кірістер комитетіне сілтеме жасап.
Ең үлкен қарыз - Алматы қаласында. Оңтүстік мегаполистің тұрғындары көлік салығы бойынша 6 млрдтан асады. Одан кейінгі орында Алматы облысы келеді. Бұл аймақтағы автокөлік иелері 4,8 миллиард теңге көлемінде салық төлемеген. Нұр-Сұлтан қаласы қарыз мөлшері бойынша алғашқы үштікте. Елордадағы автокөлік жүргізушілерінің мемлекетке 3 млрдтеңгеге жуық қарызы бар.
Борышкерлер саны бойынша антирейтингті 165 мыңнан астам адам салық міндеттемелерін орындамаған Алматы облысы бастап отыр. Екінші орында Алматы қаласы. Онда борышкерлер саны 107 мыңнан асады. Үштікке Түркістан облысы да кіреді - 104 мың адам.
МКК Салық кодексіне сәйкес салық төлеу мерзімі аяқталғаннан кейін мерзімі өткен әр күн үшін өсімппұл есептелетінін еске салады.
Айта кетейіа, салық төлеу үшін мемлекеттік кірістер органдарына барудың қажеті жоқ. «е-Salyq Azamat» мобильді қосымшасын орнатып, салық бойынша қарыз көлемін біліп, онлайн төлеу жеткілікті. Сондай-ақ, қазақстандықтар екінші деңгейлі банктердің қосымшаларын пайдалана алады.