Бұл туралы Бас прокурордың орынбасары Әсет Шындалиев мәлімдеді, деп хабарлайды BAQ.KZ тілшісі.
Қаңтар оқиғасы бойынша Қылмыстық кодекстің 99-бабы, яғни «Қасақана адам өлтіру» бабымен 150-ге жуық іс қозғалды. Олар рақымшылыққа ілікпейді. Қазіргі уақытта тергеу амалдары жүргізіліп жатқандықтан нақты санын айта алмаймын, - деп атап өтті Әсет Шындалиев Сенаттың кулуарында журналистерге берген сұхбатында.
Айтуынша, Қылмыстық кодекстің үш бабы бойынша рақымшылық жасалмайды.
Олар: 99-бап «Қасақана адам өлтіру», 146-бап «Азаптау», 451 және 362-баптар «Билікті асыра пайдалану» бойынша рақымшылық қарастырылмайды. Қазіргі уақытта қасақана адам өлтіргендер туралы нақты хабарым жоқ, - деп жауап берді Бас прокурордың орынбасары.
Белгілі болғандай, бүгінде Талдықорған қаласында қасақана адам өлтіруге қатысты бір іс қаралып жатыр.
451-бап бойынша сараланып, сотқа жіберілді. Ал қасақана адам өлтіру ісіне қатысты тергеліп жатқан полиция қызметкерлерінің бар-жоғын айта алмаймын, - деді ол.
Еске сала кетейік, бүгін Сенат отырысында Қаңтар оқиғасына қатысты «Рақымшылық жасау туралы» заң қабылданған болатын.