Прагада қазақстандық студент жоғалып кетті
Қазақстан азаматы Олег Кузьминнің туыстары әлеуметтік желі арқылы ҚР Президенті мен Сыртқы істер министрлігіне оны табуға көмектесуін өтініп арызданған болатын. Олегті 26 ақпаннан бері іздеу жұмыстары жүргізілуде, - деп хабарлайды Alashainasy.kz тілшісі adyrna.kz-ке сілтеме жасап.
20 жастағы Олег Кузьминнің жоғалып кеткені туралы ақпарат алғаш рет Vinaigrette интернет-ресурсында пайда болды.
Қазақстандық студент Прагада тұрып, білім алған, бірақ 26 ақпанда онымен байланысу мүмкін болмады. Бұл күні ол әкесіне телефон соғып, көмек сұрағанымен, байланыс кенет үзіліп қалып, ештеңе айтып үлгермеді. Содан бері жас жігіт хабар-ошарсыз кетті, – деп жазады басылым.
Баланың ата-анасы мен ағасы екі апта бойы сәтсіз ізденістерден кейін ҚР Президенті мен Сыртқы істер министрлігіне жүгінген.
Прагадағы тергеуші WhatsApp-қа жауап бермейді, телефонды көтермейді, Прага полициясының іздеулері нәтиже бермеді. Көшедегі бақылау камералары көп орнатылған қала орталығында жігіт жоғалып кеткен. Полиция камераларды тексергенімен де жігіттің табылар түрі жоқ, — деп жазды Facebook желісінде жоғалған адамның ағасы.
"Чехияда қандай да бір ақпарат немесе таныстар болса, көмектесе алатындар болса. +7 (771) 212-25-58 нөміріне хабарласуыңызды сұраймыз", - деп жазады қазақстандықтың туысы.
