Пагон таққан педагогтар көбейетін болды
Соңғы кезде мектеп оқушылары арасында қылмыс түрлері көбейіп кетті. Әсіресе топ болып төбелесу, бір-біріне пышақ ұру, есірткі пайдалану сынды келеңсіз жайттар енді бүлдіршіндердің білім ордаларына да жетті. Мұндай адам төзгісіз жағдайға тез арада шара қолданбасақ, арты жақсылыққа апармайды.
Мұны біз емес, кеше Алматы қаласы Алатау ауданындағы №166-шы мектеп-гимназиясына арнайы келген Ішкі істер вице-министрі Қалмұханбет Қасымов айтты.
— Өткен аптада Елбасымыз Нұрсұлтан Назарбаев: «Қалада ұйымдасқан қылмыстық топтар былтырғыға қарағанда, биыл төрт есе өскен. Әсіресе әрбір төртінші қылмыс фактісі кәмелетке толмағандар арасында кездесіп отыр. Сондықтан да тәртіп сақшыларына әбжіл қимылдау керек», – деп баса айтқан болатын. Әрине, бізге қарата айтылған сын орынды. Біз бұл ретте орта оқу орындарына мектеп инспекторларын қойдық. Ендігі кезекте біз инспекторлар санын әлі де арттырып, олардың жүйелі түрде жұмыс жасауына барлық жағдай жасайтын боламыз, – дейді ол.
Газетіміздің өткен нөмірінде (№59, 22.04.2009 жылы) «Алматының «бұзық» аудандары» деген тақырыпта мақала жазғанымызды көзіқарақты оқырмандарымыз жақсы біледі. Сонда біз Алматының шет аудандарында қылмыс түрлерінің жиілеп кеткендігіне тоқталған едік. Енді дәл осы мәселені вице-министр мырзамыз да көтеріп өтті.
— Әрине, біздің бұл ауданға келіп, сіздермен кездесіп отырғанымызда үлкен мән бар. Әсіресе қылмыстың басым көбі осы шет аудандарға тиесілі болып отыр. Бір жағынан «Алатау» ауданы жаңадан енді құрылып келе жатқан аудан. Мұнда учаскелік инспекторлардың мекемелері әлі толық құрылып болған жоқ. Сіздердің тыныштықтарыңызды тек «патрульдік полициялар» қорғап жүр. Алайда олар да жеткізіксіз. Сондықтан біз алдағы уақытта басшылықтың назарын осыған аударып, мұны да толық шешетін боламыз...
