Нұрсұлтан Назарбаев: Болашақ биологтерді даярлау – болашақ ғалымдарды даярлау деген сөз

Елбасымыз Сыр өңіріне сапарын Назарбаев зияткерлік мектебінің жұмысымен танысудан бастады. Бұл білім орда­сы жаңа оқу жылында оқысам-білсем деген зерек шә­кірт­терге есігін айқара ашты. Алыстан мен мұндалап көз тартатын әсем ғимаратқа қоныс тепкен мектеп 720 өрен­ге арналған. Күні ертең еліміздің қарыштап дамуына сү­белі үлес қоса білетін ұландар, негізінен, химия-биология бағы­тын­да білім алады. Мектеп жанында жатақхана бар. Білім ордасында шәкірттердің алаңсыз оқуына барлық жағдай жасалған. Жаңа оқу жылы қарсаңында мектепке оқушылар іріктеу шарасы жүргізілген. Оған облыстың әр өңірінен 4000-нан астам зейінді шәкірт қатысып, бақ сынаған еді. Олардың арасынан өзінің білім деңгейі жоғары екенін аңғартқан 550-ден астам оқушы мектепке қабылданды.
Қолдағы дереккөздеріне сүйенсек, елімізде бүгінгі таңда осындай 13 білім ор­дасы бой көтерген екен. Оның алғаш­қы қазығы 2009 жылы елордамыз – Ас­тана қаласында қағылған еді. Бүгінгі таң­да зияткерлік мектептерде білім алу әр­бір қазақстандық оқушының арманы­на айналды. Онда алдыңғы кезекте білім мен ғылымға аса көңіл бөлінеді. Бүгінгі таң­ға дейін оларды бі­тір­ген мыңнан астам түлек бар. Олардың негізгі бө­лігі, дә­лі­р­ек айтқанда, 90 пайыздан астамы Қа­зақ­стан үшін қат мамандықтар сана­лып отырған тех­ни­калық және медици­на­лық бағытты таңдайды.
Мемлекет басшысы мектепте зерек, зейінді өрен­дермен жүздесу барысында білім саласында ауқымды ш­аралар ат­қа­рылып жатқанын атап өтті. Соңғы уа­қыт­та білім саласы модернизациялаудан өткізіліп келеді. Ел­басымыз осы орайда осындай зияткерлік мектептер үшін басты басымдық дарынды оқушы­ларды табу еке­ні­не тоқталды. Олар келешекте Назар­баев уни­вер­ситетіне түсе алады. Соның нәтижесінде келешекте еліміздің элитасын дайын­дауға мүмкіндік туады.
Нұрсұлтан НАЗАРБАЕВ, Қазақстан Республикасының Президенті:
– Бүгінгі таңда елімізде химия-био­ло­гия бағытын­да­ғы мектептердің ма­ңыз­­дылығы күн санап артып ке­леді. Ке­л­е­шекте биология ғылымының ма­ңыз­ы арта түсе­тін болады. Сондықтан бұл ғылым саласы таяу жыл­дарда ма­ңыз­ды жетістіктерге қол жеткізетін бо­ла­ды. Қысқасы, болашақ биологтерді да­йындау болашақ ғалымдарды да­йын­дау екені белгілі. Қазір аталған пән на­нотехнология және математика ғы­лы­мымен бірге алдыңғы үштікте келеді. Сон­дықтан да елдің ин­дустрия­сын тү­летіп, экономикасын арттыруға үлес қо­сатын талантты балаларымыз алдың­ғы лектегі ғылым­ды ерте бастан игер­гені артықтық етпейді.
Сыр өңірінде 3-6 жас аралығындағы балалардың 80 пайызы балабақшамен қамтылған. 2015 жылы бұл көрсеткіш 100 па­йызды қамтитын болады. Осының нә­­ти­же­­сінде облыста «Балапан» бағдарлама­сын жүзе­ге асыру жобасы мерзімінен бес жыл бұрын орындалмақ.

Елбасымыз Қызылорда қаласын абат­тан­дыру және көгалдандыру жұмыстары­мен танысты. Сырдың бас шаһары бұ­рынғ­ы жылдарда жасыл желектен жадау күй кешіп келгені жасырын емес. Дегенмен «қа­лауын тапсаң, қар да жанатыны» секіл­ді, бұл ба­ғыт­та тыңғылықты тірліктің ат­қарылу нәти­же­сінде кірпік қаққандай қыс­қа уақыт ішінде облыс орталығы гүл-гүл жай­нап келбетін өзгерте түсті. Былтыр қо­нақ­қа келген адам биыл Қызылорданың түр­­леніп, жаңаша ке­йіпке ене бастағанын бірден аңғарады.
Ендігі кезекте Қызылорда қысқы спорт түрлерін дамытуға көңіл бөлмекші. Ра­сын­да, облыс еліміздің оңтүстік өңіріне қоныс теп­кен. Қақаған қыстан гөрі жайма-шуақ күн­дер басым болады. Сондықтан өңірде бұрын тек жазғы спорт түрлеріне мән бері­ліп келген. Облыс басшылығы жас өскін­дер­дің қыстың күні де сергектікті серік етуіне назар аударды. Осының арқасында мұзайдыны бар спорт сарайы елдің игілі­гіне айналды. Спорттық-сауықтыру кеше­нін аралаған Елбасымыз игі істің атқа­ры­луына ұйтқы болған азаматтарға ри­за­шылығын білдірді. Кешеннің жалпы ау­мағы 7985 шаршы метрді құрайды. Ғимарат заман талабына сай салынған. Ке­лешек­те мұнда шайбалы хоккей, мәнерлеп сырғанау, шорт-трек секілді қысқы спорт түрлерімен емін-еркін айналысуға барлық жағдай жасалған. Алдағы уақытта Қызыл­ор­дада шайбалы хоккейден команда құру жоспарланып отыр. Әзірге оған жергілікті жас­тарды үйрету үшін арнайы маман ша­қы­рылады деп күтілуде. Сондай-ақ атал­мыш орында гандбол, волейбол, баскет­бол, күрес және көркем гимнастикамен ай­налысуға әбден болады. Спорт кеше­нінде Елбасымыз Сыр топырағының түлегі, екі дүркін Олимпиада чемпионы Илья Ильин бастаған облыс спортшыларымен жүздесті.
Мемлекет басшысы келесі кезекте Қы­зыл­орда қаласындағы «Бастау» бизнес-орта­лығында болды. Онда Елбасыға саға­тына 250 жолаушыға қызмет көрсете ала­­тын халықаралық жолаушылар терми­на­­лының жобасы таныстырылды. Оның жал­пы аумағы 8200 шаршы метрді құ­райды. Жаңа әуежай халықаралық стан­дарт­тарға сәйкес бой көтеретін болады. Со­ның нәтижесінде жолаушыларға көрсе­ті­летін қызмет сапасы артады. Жоспар бо­йынша құрылыс жұмыстары 2014 жылдың күзіне дейін толықтай бітеді деп жобаланып отыр. Әуежай осыдан үш жылдай бұрын қайта жаңғыртудан өткізіліп, халықаралық талаптарға сәйкестендірілген еді.
Бизнес-орталығында жергілікті жұрт­шы­лық өкілдерімен жүздесті. Облыс әкімі Қы­рымбек Көшербаев өңірдің өзекті мәсе­ле­леріне тоқталды. Аймақ басшысы «Қы­зыл­орда облысының 2020 жылдарға де­йін­гі әлеуметтік-экономикалық даму стра­тегиясы» құжатының негізгі бағыт­тары­мен таныстырды.
 Кездесу барысында «Рза» акционерлік қо­ға­мының президенті Самұрат Имандос­ов, «Атамекен Одағы» ҰЭП жанындағы об­лыстық кәсіпкерлер кеңесінің төрағасы Асқар Махамбетов, Балық шаруашылығын дамыту жөніндегі облыстық консорциум төрағасы Әділбек Айымбетов, Қорқыт Ата атын­дағы Қызылорда мемлекеттік универ­си­тетінің ректоры Қылышбай Бисенов жә­не өзге де азаматтар өз ой-пікірлерін біл­дір­ді. Олар мемлекеттік бағдарламалардың аймақ экономикасына оң ықпалы тура­сын­­да көкейде жүрген көзқарастарын айтты.