Немістер жасанды мүше жасауды үйретпек

Алматыға Германияның жасанды мүше жасаушы маман­дары келді. Олар біздің маман­дармен өз тәжірибелерін бөліспек. Жуық арада 23 жастағы құлағы жоқ жігітке жасанды құлақ салынады.
Жасанды құлақ, мұрын, көз, жақ сүйек­терін жа­­сайтын мамандар Қазақ мемлекеттік дәрі­герлер білімін жетілдіру институты мен «Алмагест» стоматологиялық орталығы тара­пынан шақырту алған. Елімізде жасалатын жасанды мүшелер сапасыз. Ал туабітті немесе түрлі апаттың салдарынан кемтар болып қалатын адамдар саны өте көп. Мүгедектер мұндай оталардың қымбат екендігін біледі. Мамандардың айтуынша, жылына жүздеген адам келіп, жасанды мүше орнатуға тіркеледі екен. Бірақ отандық медицина сапалы жа­санды мүшелерді жасауға қауқарсыз. Бұл мәселені шешудің алғашқы қадамдары өткен жылы жасалды. Қазақстандық бір топ маман Германияның Тюбинген университетінде білім жетілдірген. Бірақ бізде жасанды мүше жасайтын технология жоқ. Сондай-ақ зертхана, арнаулы химиялық қоспалар, си­ликон жасаушы аппараттар керек. Шетел­дік маман Денис Валдың айтуынша, бұрын жасанды көз де, құлақ та пластмассадан жа­салған. Ол теріге батып, тәнді ауыртуы мүм­кін. Ал қазіргі таңда силикон қолданы­лады. Теріден өзгешелігін оңайлықпен айы­ра ал­майсыз. Жасанды екенін байқау мүм­кін емес. «Жылына мыңнан астам адамға жасанды мүше дайын­даймын», – деген Д.Вал отандық дәрігерлерге 23 жастағы құлағы жоқ жігітті негізге ала отырып, жасанды мүше орнатудың жаңа әдістерін үй­ретеді. Операция қымбатқа түсетіндіктен, па­циентке Қазақ мемлекеттік дәрігерлер білімін жетілдіру институты мен «Алмагест» стомато­логиялық орталығы қаржылай қайырымдылық көрсетпек.
Мақсұт Темірбаев, медицина ғылы­мының докторы, профессор, академик:
– Мүгедектердің тыныс-тіршілігі қоғам­ды алаңдатпай отырғанына таңғаламын. Мұрны, көзі, құлағы, жақ сүйектері жоқтар өте көп. Білікті мамандар, қайырымды аза­мат­тар жетерлік. Бұл жолы елімізде тұңғыш рет неміс мамандарының қатысуымен ота жа­салады. Десек те, бұл саланы жетік мең­геріп, дамыту­ға мемлекет тарапынан қолдау болмаса, түк шықпайды. Сол себепті сапа­лы, жасанды мүшелерге мұқтаж мүге­дек­терімізге көмек қолын созып, қатарымызға қосуға шақы­рамын.