Мұражай күні Астана мұражайларына кіру тегін

Мамырдың 18-і – Халықаралық Мұражай күні. Осыған байланысты кеше Астанадағы мұражайлардың басшылары баспасөз мәслихатын өткізіп, өздерінің сол күнгі іс-шараларымен таныстырды. Мұражай күнін атап өту 1978 жылдан басталып, 34 жыл бойы дәстүрге айналып отыр. Біздің елдің мұражайлары да бұл күнді шама-шарқынша атап өтуде.
Астана қаласы ішкі саясат басқармасы бастығының орынбасары Самат Тергембаевтың айтуынша, мамыр­дың 18-і күні елордадағы мұражайлардың есігі келем деушілерге айқара ашық, ол күні мұра­жайға кіру тегін.
Астанадағы Сәкен Сейфуллин мұражайының ди­рек­торы Несіпбек Айтұлы да астаналықтарды мұра­жайға келуге шақыруда. «С.Сейфуллин мұражайы тек Сәкен Сейфуллиннің өз басына ғана тоқталып қоймайды, бұл мұражай Сәкен өмір сүрген ғасырдағы қазақ мемлекетінің басынан өткен барлық қиын­шы­лықтар жөнінде, Алаш ардагерлері кешкен нәубет, сондай-ақ Кеңес үкіметіне қызмет еткен партия қайраткерлері туралы мағлұматтарды қамтиды. Ал Сәкеннің өзінің жеке басына қатысты қаншама экспонаттар бар. Жалпы, бас-аяғы 6 мыңнан асады. Мұражай да күрделі жөндеуден өтті. Сондықтан да халықты құшақ жая қарсы алуға дайынбыз», – дейді жазушы Несіпбек Айтұлы.
«Атамекен Қазақстан картасы» этно-мемориалдық кешені де мұражай күніне орай біраз шаралардың жоспарын әзірлеп қойыпты. Соның бірі – «Өзгерген әлемдегі мұражай. Шабыттың қайнар көзі мен жаңалыққа ұмтылу» деп аталады. Шараның мақсаты – заманауи мұражайдың атқарылып отырған істерімен жұртшылықты таныстыру. Сондай-ақ шара бағдарламасында Қазақстан мұражай қауымдасты­ғына арналған «Шексіз мұражай» атты бейнеконфе­ренция өткізу де жоспарланып отыр. Бұл мұражай мереке күні сағат 12.00-ден 15.00-ге дейінгі уақыт аралығында тегін жұмыс істейді. Мұражай түрлі байқаулар ұйымдастырмақ. Сондай-ақ «Мұражайда­ғы түн» көркем фильмін де көрермендер назарына ұсыну жоспарланып отыр.
Бұдан басқа «АЛЖИР», «Алтын және бағалы ме­тал­дар» мемлекеттік мұражайының, қазіргі заманғы өнер мұражайының да келем деушілерге есігі ашық болады.
Астана қаласының әкімдігі мұражайдағы экспонат­тарды электронды форматқа енгізу бойынша үлкен бағдарламаны жүзеге асырып жатыр екен. «Мұның мақсаты – Қазақстандағы барлық жәдігерлерді әлемге таныту», – дейді Самат Тергембаев.