Ақтөбе облысында жол апатынан қаза тапқан мектеп директорларын жер қойнына тапсырды, деп хабарлайды Stan.kz ақпарат агенттігі.
Ақтөбе облысындағы Қобда-Ойыл жолының 156 шақырымында 19 маусымда апат болды. Жол талғамайтын көлік аударылып, екі әйел қаза тапты. Тағы екеуі өмір үшін күресіп жатыр. Қаза болғандар мен зардап шеккендер - әріптестер, Ақтөбедегі мектеп директорлары.
Ақтөбе халқы қаза тапқан мектеп директорларын ақтық сапарға шығарып салды.
Бағдат Үрімбаева бүкіл өмірін білім саласына арнаған. Үнемі күліпсіреп, әдемі болып жүретін. Алты жыл Ақтөбе қаласындағы №20 мектеп-лицейді басқарды. Оқу орнының кіреберісі бүгінде гүлдерге толы. Марқұмды еске алуға оқушылардың ата-аналары мен әріптестері келді.
“Ол жауапты, бірде-бір жанжал болған жоқ. Екі қыз тәрбиеледі. Ең кішісі биыл бірінші сыныпқа барады", – деді № 20 жалпы орта білім беру мектеп-лицейінің қызметкері Рысты Құлманбетова.
"Біз жұмыс күнін толық істейтін едік, бір-бірімізге жақсы демалыс күндерін тіледік, ол: "Жолға шығамын"деді. Мен оған: “Жолың болсын!", – дедім. Біздің барлық әріптестеріміздің, мектеп қызметкерлерінің есінде ол мейірімді, шыншыл адам болып қала береді. Оның үлкен жоспарлары болды", – деді № 20 жалпы орта білім беретін мектеп-лицейі директорының оқу-тәрбие ісі жөніндегі орынбасары Әсем Ақназарова.
Екінші марқұм Альмира Оракованың да үлкен жоспарлар болды. Ал қазір әріптестері көз жасын тыя алмайды. Мұғалім жұмысына шынайы берілді: бір кездері ол бірнеше қалалық колледждерді басқарған. Осыдан төрт жыл бұрын 33-ші мектептің директоры болды.
“Ол ешқашан адамдарды бөлмеген. Бәріне жақсы қарады. Өте өкінішті, әлі күнге дейін сенбеймін", – деді № 33 орта мектебінің дене шынықтыру пәнінің мұғалімі Оразбай Ұлқабай.
Жол апатынан басқа екі оқу орнының басшылары – Ақгүл Қисықова мен Шолпан Баяділова аман қалды. Олардың өмірі үшін Ойыл аудандық ауруханасының дәрігерлері күресуде. Дәрігерлер болжам жасауға асықпайды: олардың бірінің сүйектері сынып, миы шайқалған. Екіншісі жансақтау бөлімінде жатыр.
"Қазіргі таңда жағдайы тұрақты ауыр. Бүгін санавиация мамандары тексереді. Қажет болған жағдайда қалалық емханаларға жатқызылады", – деді облыстық денсаулық сақтау басқармасы басшысының орынбасары Бекболат Оразбаев.
Мектеп қызметкерлерінің айтуынша, жол талғамайтын көлік марқұм Бағдат Үрімбаеваға тиесілі болған. Бірақ сол қайғылы кеште оны әріптесі Альмира Оракова айдаған. Олардың бірлескен сапарының жұмысқа ешқандай қатысы жоқ еді.
"Ойыл ауданына киелі орындарға барды. Бұл олардың жеке сапары болды", – деді қалалық білім бөлімінің бастығы Метгүл Қосымбаева.
Апаттың барлық егжей-тегжейін полиция анықтайды. Бірақ қазірдің өзінде белгілі: жүргізуші жол ережесін бұзып, көлікті басқара алмады.