Экологтер төсбелгілермен марапатталды

Алматылық экологтар бүкіләлемдік қоршаған ортаны қорғау күнін атап өтті. Ерен еңбектері үшін олар төсбелгілер мен құттықтау грамоталарына ие болды.
Маусымның 5-і – бүкіләлемдік қор­шаған ортаны қорғау күні. Алматы қала­сының эколог мамандары бұл күнге арнап мерекелік жиын ұйымдастырды. Олар оңтүстік астанамызда орналасқан Гидро­метеорологиялық мониторингі орталығын­да (ГМО) бас қосты. Аталмыш мерекені 1972 жылы БҰҰ Бас Ассамблеясы қоғам қоршаған ортаны қорғап, сақтасын деген мақсатпен жариялаған болатын. Мере­келік шараны Алматы қаласы Гидро­метеорологиялық мониторингі орта­лығының директоры Қонысбек Байеділов құттықтау сөзімен ашты. Барлық эколог мамандарын мереке күнімен құттықтап, олардың планетамыздың экологиялық жағдайын жақсартуда қосып жатқан үлестерін ерекше атап өтті. Қаламыздың экологиялық жағдайларын зерттеумен орталықтың химико-аналитикалық зерттеу бөлімі айналысады. Атмосфералық ауаға, жауын-шашынға, жер беті суларына, топыраққа және радиациялық сынама­ларға зерттеулер мен бақылаулар жүргізіп, сараптамалар жасайтын да осы бөлімше. Орталық басшысы осынша қызмет атқарып жүрген экологтердің еңбегі ең жоғары бағаға ие екендігін де айта кетті. Сонымен қатар биылғы жылы Қазгидромет меке­месіне 90 жыл толып отыр. Қос қуанышқа ортақ болған мере­келік жиын барысында жетістіктері айты­лып жүрген, жұмыстағы ерен еңбектері үшін қыз­мет­керлер ме­дальдар және құттықтау дипломдарымен марапатталды. Мерекелік кешке Бостандық ауданы әкі­мінің орын­басары Саят Ағыбаев, Балқаш-Алакөл экология департаменті басшы­сының орынбасары Бекет Жұма­ділов, Алматы қаласы Табиғи ресурстары және табиғатты пайдалануды реттеу басқар­масының өкілі Михаил Новоселов, Алматы қалалық ГМО қызметкерлері мен желі бақылаушылары қатысты.