Ашық құдыққа тағы бір бала құлады

Теміртауда ашық люктің ішіне тағы бір бүлдіршін құлап кетті. Қалалық әкімдік құдықтардың қақпақтарын үш жылда жаңаламақ. Оқиға орнында әлі де тексеру жұмыстары жүргізіліп жатыр. Осыдан бір апта бұрын ашық құдықтан ажал құшқан бала өлімі тіркелген болатын.
Теміртау қаласында тағы бір бүлдіршін ашық канализация құдығына түсіп кетті. Абырой болғанда, өтіп бара жатқан жаяу жүргінші құтқарып қалып, бала жапа шеккен жоқ. Маусымның 1-і Халықаралық балаларды қорғау күнінде өлім аузынан аман қалған балғынның жасы – 4-те. «Ашық құдық», ынталы топ мүшелерінің айтуын­ша, бала дене жарақатын алма­ғанымен, қатты қорқып қалған. Оқиғаны полиция қызметкерлері растап, Қарағанды облы­сының ІІД «Осы факті бойынша тексеру жұмыстары жүріп жатыр» деп хабарлайды. Ал қалалық әкімшіліктің айтуынша, қаладағы коммуналдық қыз­меттердің барлық құдықтарының жағдайлары тек­серіліп, жаңа қақпақтар орнату жоспар­ланып отыр. Құдықтардың барлығын толығымен ішінен жабатын полимер қақпақтарға ауыстыру үшін шамамен үш жыл уақыт керек. Коммунал­дық қызмет­шілердің мәліметтері бойынша, қалада 8,5 мың құдық бар. 380 ашық люктер орнатылған. Естеріңізде болса, Теміртау қаласында мамырдың 24-і күні кешкі серуен кезінде екі жасар Егор Хмиль Метал­лургтер даңғылында орналасқан канализациялық құдыққа құлап, көз жұмған еді. Егордың анасы оның артынан құдыққа түсіп, құтқармақ болды. Бірақ оны­сынан түк шыққан жоқ. Баланың дене­сін сүңгуірлер екі тәулік өткеннен кейін фекалды сорғы стансысының тұн­дыр­ғы­шынан тапқан болатын.