Ақтөбенің бас полицейі әйел сабаған ба?

Ақтөбе қалалық полиция басқармасының бастығы Қайрат Мырзабеков «қарамағында жұмыс істейтін әйелге қол жұмсаған» деген күдікпен қамауға алынды. Оқиға қарашаның 24-і күні болған. Соққыға жығылған әйелдің есімін әріптестері құпия ұстап отыр. Бізге оның жасы 30-да екені ғана мәлім. Облыстық ішкі істер департаменті Мырзабековтің абақтыда отырғанын растағанымен, әзірге оған қандай айып тағылғанын айтпай отыр.
– Аталған деректі жоққа шығара алмаймын. Подполковник Қайрат Мырзабековке біздің тара­пы­мыздан бұрын-соңды ешқандай шағым болған жоқ. Қазір бұл іспен департаменттің өзіндік қауіпсіздік бас­қармасы айналысуда, – деді облыстық ІІД баспасөз қыз­метінің бастығы Алмат Иманғалиев. Алмат Иманғалиев Ақтөбенің бас полицейі уақытша тергеу изоляторында (ИВС) деген болатын. Ал Ақтөбе облыс­тық сотының баспасөз хатшысы Илиада Досова берген ақпарат оған кереғар. Илиада Досованың айтуынша, қараша айының 28-і күні Ақтөбедегі №2 сот Қайрат Мырзабековті тұтқындау (арест) туралы санкция берген. Ал мұндай жағдайда Қылмыстық іс жүргізу кодексінің 150-бабы бойынша күдікті тек тергеу изо­ляторына (СИЗО) қамалады. Қарашаның 25-і күні ақтөбелік полицейлер «Зорлық-зомбылықсыз 16 күн» атты дәстүрлі акцияны бастаған болатын. Бұл – әйел­дерді тұрмыстағы зорлық-зомбылықтан қорғауға ба­ғыт­­талған акция. Бас-аяғы бес тәулікте полицияға некелі күйеуі немесе көшедегі бейтаныс адамнан зорлық-зомбылық көрген 97 әйел хабарласып, көмек сұраған. Қалалық жедел жәрдем ауруханасының көмегіне жүгінген 30 жастағы полицей әйел – солардың бірі ғана. «Ол кісі өткен сенбі күні өз өтініші бойынша ауруха­надан шығып кетті. Мен сізге басқа ештеңе айта алмаймын. Дәрігерлік құпия. Полициядан сұраңыз», – деді аурухананың бас дәрігері Сәубет Келімбердиев. Полиция подполковнигі Қайрат Мырза­беков Ақтөбе қалалық ішкі істер басқармасын былтыр­ғы қазан айынан бері басқарып келді. Бұған дейін ол Хромтау аудандық ішкі істер бөлімінің бастығы болған.