Ақтөбе қаласының әкімі еңбек ардагерін құттықтады
Ақтөбе қаласының әкімі Мұрат Жөребеков еңбек ардагері, мәдениет қайраткері Еркін Құрманбековті Отан қорғаушылар күнімен құттықтап, облыс басшысының құттықтау хатын және мерекелік сый-сияпат табыстады.
Мұрат Жөребеков еліміз үшін күрделі кезеңдерде аға буынның тәуелсіздікті нығайтуға қосқан үлесі, еңбек жолы жастарға үлгі екенін айтып, алғысын білдірді.
Ұзақ жылдар мәдениет саласына еңбегі сіңген Еркін Жолмырзаұлы өз кезегінде елге бейбітшілік тілеп, батасын берді, сәлем бере келгені үшін әкімге ризашылығын білдірді.
Еркін Құрманбеков 1944 жылы Ақтөбе облысы Байғанин ауданында дүниеге келген. Еңбек жолын ауыл мұғалімі болып бастаған ол идеология саласында қызмет істеді, мәдени-бұқаралық жұмыстарға, спортқа, жастармен жұмысқа көңіл бөлді. Кейін облыстың мәдениет саласында еңбек етті, 1995-2003 жылдары облыстық мәдениет басқармасының басшысы болды.
