Күйеуіне көмектеспек болған атышулы Бергей Рысқалиевтің әйелі дауға қалды
Атырау облысының экс-әкімі Бергей Рысқалиевтің азаматтық некедегі әйелі Динара елден қашқан жарына қомақты қаражат жолдаймын деп соттан бір-ақ шықты. Бұл туралы NUR.KZ порталы NewTimes.kz агенттігіне сілтеме жасап хабарлайды.
Есіл аудандық сотында өткен азаматтық істің алдын ала тыңдалымына журналистерді кіргізбеді. Дегенмен белгілі болған ақпаратқа сәйкес, жанжал ірі қаражатқа бола туындаған. Бергей Рысқалиевтің азаматтық некедегі әйелі Динараға өзгенің 2,9 млн доллар қаражатын қолды қылды деген шағым жасалды. Шағымды Динараның үстінен оның немере ағасы Арман Сандыбаев түсірген.
"Арман арқылы ол (Динара - NT ескертпесі) өзінің азаматтық күйеуі Бергей Рысқалиевке қаражат жолдамақ болған. Оның Бергейден екі баласы бар. Ол ақшаны Бергей Рысқалиевке жібермек болғанда, мұны білген күйеуім бірден бас тартты. Алайда ол банктердің бірінде VIP-клиент болғанын пайдаланып, менеджер арқылы алдамшы әрекетпен менің күйеуімнің шотындағы 2,9 млн долларды өзге шотқа аударып жіберген", - дейді бизнесмен Сандыбаевтың әйелі.
Оның айтуынша, Динара Бергеймен бірге болу үшін Лондонға кетіп қалғысы келген, алайда оған визада рұқсат берілмей қойыпты. Ал Сандыбаев Польша мен Молдавиядан жеміс-жидектерді импорттауды кәсіп ететін көрінеді.
Еске салсақ, Бергей Рысқалиев аймақ басшысы болып тұрған кезінде "мелмекет қаржысын ірі сомада жымқырып отырды" деп айыпталып, оны қамауға алу шешімі шығарылған болатын. Алайда Рысқалиев елден ізін суытып, бүгінде оған халықаралық іздеу жарияланды.
