Жуырда шырайлы Шымкент шаһарында ұлттық жекпе-жектен тұңғыш рет Қазақстан кубогы өтті. Бұл доданы Қазақстан Республикасы Спорт және денешынықтыру агенттігі мен Оңтүстік Қазақстан облысы әкімдігінің қолдауымен Республикалық жекпе-жек федерациясы ұйымдастырды.
Жастар мен ересектер арасында өткен айтулы турнирге еліміздің түкпір-түкпірінен жиналған 200-ге тарта спортшы қатысып, өз салмақтарында жүлделі орындарды сарапқа салды. Алғаш болып іріктеу кездесулерін 16-18 жас аралығындағы бозбалалар бастады. Әрқайсысы 3 минуттан тұратын екі кезеңде жеңімпаз анықталмаса, чемпиондық атақтың тағдыры қосымша 3 минуттық кезеңде шешілді. Мұнда ереже бойынша қос қарсыластың бір-бірінің көзін шұқуына, тістеуіне, тырнауына, кіндіктен төмен тебуіне, төрттағанда немесе жатқанда бастан, беттен ұруына тыйым салынған.
Сабыржан МАХМЕТОВ, ҚР жекпе-жек федерациясының президенті:
– Біз мұның алдында, яғни үстіміздегі жылдың мамыр айында Талдықорған қаласында тұңғыш рет Қазақстан чемпионатын өткізген болатынбыз. Сол додада ересектермен қатар, жастардың да шамасын байқап көргенбіз. Өйткені дер кезінде лайықты ізбасарлар дайындап отырмасақ, батыр бабаларымыздан мирас болып қалған төл жекпе-жегімізді шын мәнінде жаңғырта да, дамыта да алмаймыз. Біздің басты мақсатымыз – дүбірлі додаларда ел намысын қорғайтын шеберлігі жоғары спортшыларды баптаумен қатар, Отан алдындағы азаматтық борышын абыроймен өтейтін нағыз жаужүрек жауынгерлерді тәрбиелеп шығару. Ұлттық спорт түрлері қауымдастығы ауқымындағы Республикалық жекпе-жек федерациясының құрылғанына небәрі екі жылдан астам уақыт өтті. Әрине, әзірге біздің қаржылай-материалдық жағдайымыз мәз емес. Тіпті нашар десем де болады. Негізінен, жергілікті әкімшіліктер мен төл жекпе-жегімізге бүйрек бұратын демеушілеріміздің арқасында түрлі деңгейдегі жарыстарды өткізіп келеміз. Мысалы, Ресей Президенті жекпе-жек түрлерімен айналысатын спортшыларға айрықша көңіл бөліп, қамқорлық жасауда. Нәтижесінде көрші елде жекпе-жек өнері қарқынды даму үстінде. Сондықтан арғы тегі Ұлы Даладан шыққан ұлттық жекпе-жегімізге мемлекет тарапынан пәрменді қолдау көрсететін уақыт әлдеқашан жетті деп ойлаймын.
Үш күнге созылған турнир қорытындысында жастар арасында Мәди Үдеров, Абзал Мақсат, Нұрбек Теңізбай, Мәулетжан Шәріпов сынды жас дарындар айрықша көзге түсіп, мамандар тарапынан жоғары баға алды. Ересектер бәсекесінде кубок үшін негізгі тартыс Оңтүстік Қазақстан және Жамбыл облыстарының құрама командалары арасында өрбіді. Нәтижесінде екі жақта үш-үш алтыннан олжалады. Тек өзге жүлделерінің сәл артықшылығымен Оңтүстік Қазақстан облысының спортшылары бас кубокты жеңіп алды. Үшінші орын қызылордалықтардың еншісіне бұйырды.
Ұлттық жекпе-жектен тұңғыш Қазақстан кубогы
Жастар:
50 келі: Бағдат Нысанбай (Қызылорда обл.)
53 келі: Мәди Үдеров (Ақтөбе обл.)
56 келі: Абзал Мақсат (Жамбыл обл.)
59 келі: Жарас Қапан (Жамбыл обл.)
63 келі: Нұрбек Теңізбай (Қызылорда)
67 келі: Бауыржан Төлтан (ОҚО)
71 келі: Еркін Дәрмен (Алматы)
75 келі: Сырым Айтбай (ОҚО)
+75 келі: Мәулетжан Шәріпов (Алматы)
Ересектер:
55 келі: Жалғас Жұмағұлов (Ақтөбе обл.)
60 келі: Темірлан Ағанасов (ОҚО)
65 келі: Гиесжан Эрметов (Жамбыл обл.)
70 келі: Нұржан Тұтқаев (Атырау обл.)
75 келі: Нұрлан Сауранбаев (Жамбыл обл.)
80 келі: Гойха Дазаев (Ақтөбе обл.)
85 келі: Игорь Свирид (Жамбыл обл.)
90 келі: Сейітхан Махмудов (ОҚО)
+90 келі: Сейітбек Есіркеп (ОҚО)