Түсіпхан Сайханов дүние салды
Мамырдың 8-інен 9-ына қараған түні танымал спортшы, белгілі бапкер, білікті төреші Түсіпхан Сайханов жол апатынан қайтыс болды.
Еркін күреспен жастайынан айналысып, Одақ көлеміндегі додаларда жүлде алған Түсіпхан Сағатбекұлы кейіннен жаттықтырушы болған. 2004 жылы еркін күрестен Афины Олимпиадасында күміс медаль алған Геннадий Лалиевті баптаған болатын. Лалиевтің Қазақстанға келуіне де жағдай жасаған оның жеке бапкері Түсіпхан Сайханов еді.
Түсіпхан Сағатбекұлы ФИЛА-ның Халықаралық дәрежедегі экстра «А» санатындағы төрешісі болатын. Мұндай төрешілер Қазақстанда саусақпен санарлық. Түсіпхан Сайханов Олимпиада ойындарында, әлем чемпионаттарында және көптеген халықаралық турнирлерге төрелік етті. Он жылдан астам уақыт ҚР төрешілер алқасының төрағасы қызметін атқарды. Шымкент қаласының №3 Олимпиада ізбасарларын дайындайтын балалар мен жасөспірімдердің мамандандырылған кешенді спорт мектебінде директор болды.
13 мамыр күні 60 жасқа толатын мерейтойына қонақтарын шақырып қойған Түсіпхан аға Алатау бөктеріндегі осындай бір мерейтойдан қайтып бара жатып дүние салды...
Жатқан жеріңіз жайлы, топырағыңыз торқа, жаныңыз жаннатта болсын!
