Орал шаршы алаңында оза шапқандар
Оралда Қазақстан әуесқой бокс федерациясының құрметті президенті А.Құлыбаевтың жүлдесі жолындағы халықаралық турнир мәресіне жетті.
Аталмыш турнирдің басында батысқазақстандық меценаттар қазақ боксының Ермахан Ибрайымов пен Серік Сәпиев секілді серкелеріне сый-сияпат жасады. Тұманды Альбион төрінде көк байрағымызды желбіреткен Серік сәйгүлік мінді. Осы сайысты ұйымдастыруға ұйытқы болған Батыс Қазақстан облысының әкімі Нұрлан Ноғаевқа арнайы кәдесый тапсырылды. Облыс басшысы 52 келіде жүлдегер атанған спортшыларды марапаттау рәсіміне қатысты.
Жалпы, бес күнге созылған дүбірлі додада бес елдің 140 спортшысы шаршы алаңға шықты. 49 келіде алматылық қос боксшы Әділет Қапезов пен Әнуар Мұзапаров бас жүлдеге таласып, қарсыласынан тәжірибесі де, жасы да үлкен Әділет бір ұпай айырмашылығымен жеңіске жетті. 52 келіде ресейлік В.Веткиннің жарақатына байланысты жеңіс оралдық Айдарбек Жәдігеровке бұйырды. 56 келіде ақмолалық Нұрсұлтан Қойшығұлов, 60 келіде Тәжікстан боксшысы Анвар Юнусов, 64 келіде алматылық Елдос Сарықұлов, 69 келіде атыраулық Бекболат Құрамысов, 75 келіде оралдық Алмасбек Орынғалиев жеңіс тұғырының ең биік сатысынан көрінді.
Әрине, жергілікті жанкүйерлер 81 келі салмақта өнер көрсететін Дәурен Елеусіновтың жекпе-жегін асыға күткен-ді. Бұрынғы оралдық, қазір елордалық боксшы Ресей елінің өкілі Сослан Асбаровты еш қиындықсыз жеңді. 91 келіде ел чемпионы Виталий Левитке ресейлік Манаур Сардалов қауқар таныта алмады. Аса ауыр салмақта оңтүстікқазақстандық Бауыржан Бекзатовтың бағы жанды.
Алыстан ат шалдырып жеткен қонақтар да құр қол кеткен жоқ. Оралдағы халықаралық турнирден қола жүлдемен атанған қонақтар сапында В.Егоров, Р.Исмаилов, А.Гасанов, И.Хатаев, В Федюрин, Н.Аганин, Р.Кодзоев (бәрі – Ресей), К.Согомонян, А.Давитян (екеуі де – Армения), И.Ахметов, А.Панарин (екеуі де – Қырғызстан), О.Авзалшоев (Тәжікстан) және басқалар бар.
