Желтоқсанды жырлаған ақындар марапатталды
Бірінші желтоқсан күні Қазақстан Жазушылар одағының мәжіліс залында «Тәуелсіздік бастауы – желтоқсан» республикалық жыр мүшәйрасының ақтық сыны өтіп, жеңіпаз ақындарды марапаттау рәсімі болып өтті.
Мүшәйраға Бақытжан Момышұлы, Темірхан Медетбек, Ибрагим Исаев, Қазыбек Иса сынды қаламгерлер қазылық етті.
Сонымен:
Бас жүлде – ZAZ Chance маркілі автокөліктің иесі – Бақытбек Смағұл танылды.
1-орын – (500 000 теңге) Аманғазы Кәрібжанұлы мен Әлібек Шегебайға;
2-орын – (300 000 теңге) Талғат Ешенұлы мен Асқар Көбенұлына (ҚХР);
3-орын – (200 000 теңге) Алмас Темірбай мен Ақберен Елгезекке бұйырды.
Арнайы жүлделер (әрқайсысына 100 000 теңгеден):
Тоқтарәлі Таңжарыққа – Қайрат Рысқұлбеков атындағы;
Жарас Кемелжанға – Ербол Спатаев атындағы;
Динара Мәлікке – Ләззат Асанова атындағы жүлде табысталды.
Барлық жеңімпаздарды «Тарихи әділеттілік» Республикалық қоғамдық комитетінің төрағасы Смағұл Елубай, осы жобаның бастамашысы Азат Перуашев және «Ұлы дала» Республикалық қоғамдық бірлестігінің жетекшісі Ғабиден Жәкеев құттықтап, ақындарға шығармашылық табыс тіледі. Жүлделі шығармалар мен мүшәйраға тапсырылған өзге де таңдаулы өлеңдер республикалық басылымдарда жарияланып, жеке кітап болып шығады.
