Шахмет Құсайынов атындағы театр «Ең үздік актерлік ансамбль» атанды
Шахмет Құсайынов атындағы Ақмола облыстық қазақ музыкалық драма театры Таразда өткен республикалық байқауда «Ең үздік актерлік ансамбль» атты жүлдені иеленді.
Қазақстанның 10-нан астам театры қатысқан байқауда ақмолалық шығармашылық ұжым неміс драматургінің еңбегін көрермендер назарына ұсынған.
«Әл-Тарази шақырады» атты республикалық театр байқауы биыл бірінші рет өткізіліп отыр. Мақсат – әртістердің сахнадағы шеберлігін шыңдау, актерлердің өзара тәжірибе алмасуына жағдай туғызу. Тараздан табыспен оралған әртістерді теміржол вокзалында қарсы алған көкшеліктер олардың құшағын гүлге толтырды. Байқауда үздік атанған театрдың бұл табысы шығармашылық ұжымның ізденісін танытса керек.
Фархат ҚАНАФИН, Ш.Құсайынов атындағы Қазақ музыкалық драма театрының режиссері:
– Біздің жігіттер, қыздар жоғары дәрежеде ойнап өздерінің шеберліктерін танытты. Олар қазылар алқасының жоғары бағасын алды. Біздікі ең жоғары дейтініміз – басқа театрлар ең үздік әйел рөлі, ер адам рөлі, ең үздік дебют сияқты аталымдарға ие болса, ал біз «Ең үздік актерлік ансамбль» номинациясын алдық. Яғни біздің әртістердің ойыны – жоғары дәрежеде.
