Регата жұртшылық назарын Іле-Балқаш мәселесіне аударады

Сәуірдің 30-ында басталған дәстүрлі Іле-Балқаш регатасы жарысы мамырдың 29-ында Қапшағайдың солтүстік жағала­уын­да мәреге жетті. Желкенді жә­не ескекті су көліктерімен сын­ға түскен 70-ке жуық ко­ман­да арасынан нағыз мықтылар ірік­телді.
Іле-Балқаш регатасы биыл 11-жыл өт­кізіліп отыр. Шараны ұйымдастырушы «Та­биғат» экологиялық одағы Іле мен Бал­қаш­тағы қайық жарыстарына көпшілікті қа­тыстыра отырып, осы табиғи суқоймалар қо­рын сақтау және молайту мәселесіне қо­ғам назарын аударып келеді. Биыл рафт, ка­та­маран, байдарка, ескекті қайық, қаң­қалы сал, үрлемелі сал, каноэ, альбатрос сияқты су көліктерімен спринтерлік-ма­рафон­дық және көпкүндік супермарафон бәй­гелеріне қатысушылар жылдағыдан көп болды. Жарыстың әр түрі бойынша жеңімпаздарды жеке-жеке марапаттау тура бір сағатқа созылды. Командалар арасынан «Меншік құқығын қорғау одағы» қоғамдық бірлестігі атынан сынға түскен қыз-жігіттер көп жүлдеге ие болды. Мұның алдында мамырдың 2-9 аралығында Балқашта VI халықаралық желкенді регата ұйымдастырылған еді. Бірнеше елден ша­қырылған желкеншілердің 20-дан астам командасы Саяқ кенішінен Балқашқа дейін жарыса жүзіп өткен. Әдетте осындай эко­логиялық шаралардан соң кісі көп жи­нал­ған жерлерге қоқыс үйіліп қалып жатады. Бір­ақ «Табиғат» экологиялық одағы регата­дан соң жағажайды мұнтаздай етіп тазар­туды дәстүрге енгізген. Одақ жетекшісінің қатысушыларға қатысты титтей қағаз да қал­дырмай тазалап кету туралы бұйрығы да бар.
Владислав ПОКУСОВ, «Меншік құқығын қорғау одағы» қоғамдық бірлестігі командасының мүшесі:
– Біздің команда барлық сын бо­йын­ша жақсы нәтиже көрсетті. Командамыз не­гі­зі­нен 18-24 жас аралығындағы жастардан тұ­ра­ды, бірақ жарысқа қатысушылар ара­сын­да ересектер де, үш-бес жастағы балалар да болды. Командалар жарыстың барлық тү­рі бойынша қатысты.
Мэлс ЕЛЕУСІЗОВ, «Табиғат» экологиялық одағының төрағасы:
– Біз 11 жыл бұрын Балқашты сақтау мә­селелеріне арналған үлкен форум өт­кіз­генбіз. Қытай Іленің суын көбірек пай­да­ла­натын, сондықтан Іле суын молайту мәсе­ле­сін біз регата арқылы халыққа кең наси­хат­тауды мақсат еттік. Бұл жарыс кейін үл­кен туристік шараға айналды. Дүниежүзін ға­лам­дық жылыну құбылысы алаңда­тып отыр­ған қазіргі мезгілде Алатау­дың басын­да­ғы мұздықтарды сақтау, Іле, Қапшағай, Бал­қаш пен басқа да өзен-суларды құр­ға­тып алмау мәсе­лелеріне көбірек көңіл бөлген жөн.