Қазақстан ауылының полицейлері не қарап отыр?

27 қараша күні Шығыс Қазақстан облысының Күршім ауданы Боран ауылдық округіне қарасты Қазақстан ауылының тұрғыны Мақсат Өзбекұлының қорасындағы шөбі өртенеді. Ертесінде және 3 желтоқсан күні дәл осы жағдай ауылдағы екі отбасының үйінде қайталанады. Айта кетерлігі, қорасындағы шөбінен айырылған үш отбасы да Қытайдан келген қандас бауырларымыз.
Өкініштісі, содан бері қанша уақыт өтсе де, жергілікті құқық қорғау қызметкерлері үш бірдей отбасының шөбін өртеген жан­дар­ды іздеуге құ­лық­сыз­­дық танытып отыр­­­ған көрінеді. Шөбі өртенген тұр­ғын­дар осы­ған алаң­дау­лы.
– Бізге ештеңенің де қажеті жоқ. Бізге тек тыныштық керек. Біз­дің сұрайтынымыз – бейбіт жатқан от­ба­сы­ларды қыстың көзі қы­рауда қан жылатқан қатыгездер табы­лып, олар лайықты жазасын алса дейміз. Алайда жергілікті полиция қыз­мет­кер­ле­рі­нің түк білмегендей қылық танытып, өз мін­деттерін орындаудың орнына еш әрекетсіз отыруы күннен-күнге үмітімізді үзіп барады, – дейді 2007 жылы Қытайдан туған топыраққа оралған қандасымыз Мақ­сат Өзбекұлы.
Қазақстан ауылындағы үш қанда­сы­мыз­дың қорасындағы шөбі бірінен соң бірі өртенгеннен бері ауылды мекен еткен өзге де оралман бауырларымыздың осы кепті кие­міз бе деп мазасы қашып, әбден бере­ке­сі кеткен көрінеді. Халықтың мұңын мұң­дай­ды деген полицияның жүрісі болса анау.
– Ауылдағы кемпір-шалдар жылап отыр. Қай-қайсысы да шөбіміз қашан өр­те­ніп кетеді деп алаңдаулы. Күндіз күлкіден, түнде ұйқыдан айырылды. Әрқайсысы бас­қа жұмыстарын ысырып қойып, қора­да­ғы шөбін қарауылдап отыр. Әйелі түнде қорасын екі сағат қараса, ері екі сағат кү­зетеді. Мынадай суықта кірпік қақпай да­ла­да отыру оңай ма? Олар әбден шар­ша­ды. Мұндағы оралмандар қыстан аман-есен шықсақ, Қытайға кетеміз деп отыр, – дейді ол.
Ауыл әкімдігінің жиналыс өткізгені бол­маса, шөбінен айырылған тұрғындарға ай­тарлықтай жәрдем көрсетпеген. Қайта ауыл әкімдігінен гөрі ауыл аза­мат­та­ры көмек қолын созып, қыстан аман шы­ға­рып береміз деп үш отбасының малдарын бөліп алыпты.
Істің мән-жайын білу үшін Боран ауыл­дық округінің әкіміне телефон шалып едік, ала алмадық. Тұтқаны әкімдіктің іс бас­қа­ру­шысы Айдос Наурызбаев көтерді.
– Шөппен көмектесіп жатырмыз. Олар­дың малдарын шөбі барлар бөліп алды. Қыс­тан алып шығамыз деп отыр. Ауылдағы ағайын көмектесіп жатыр. Сөйтіп, қыстан шығарып береді, – деді.
Шөбі өртенген ауыл тұрғындарының айтқанын біздің есі­міз­ге қайта салды демесеңіз, іс бас­қа­ру­шысының аузынан орын алған оқиғаға қа­тысты мардымды жауап ести алмадық. Осы оқиғаға бай­ла­нысты қандай іс-ша­ра­лардың қолға алы­нып жатқанын да сұра­дық. Бұл сауалымызға да жарытып жауап бермеді. Бар айтқаны «Полиция тек­серді. Өрт болған сайын барып жүр» болды. Сөйтті де: «Міне, полицияның өзі кел­ді», – деп, тұтқаны Қазақстан ауылына жауап­ты полиция өкілі Руслан Нұрланұлына қосты. Ол кісімен де әңгіме ұзаққа созылған жоқ.
– Біз қазір тексеріп жатырмыз, – деп сөзін бастаған ол: «Бастыққа хабарласыңыз» деп аяқастынан түсініктеме беруден бас тартты.
– Бастықтарыңыздың телефондары қан­дай? Беріңізші, сөйлесейік, – деп едік, «Ин­формация не разглашается», – деді де, телефон тұтқасын қоя салды. Міне, жергілікті халықтың сенім артқан жауапты тұл­ғаларынан естіген жауабымыздың түрі осындай! Ештеңе болмағандай жайбарақат. Ал күндіз-түні ұйқы көрмей, бейбіт күнде берекесі кеткен ауыл тұрғындарының жайы жоғарыда айтқанымыздай. Дегенмен бұл мәселе жақын күндері бір шешімін табар деп ойлаймыз. Аудан, облыс бас­шы­лы­ғы қалыптасқан жағдайды тез арада қалыпқа келтірер деп сенеміз.