Өндірісті өлкенің бас шаһарының экологиялық хал-ахуалы күн тәртібінен түспей отыр. Оның көкейкесті мәселелері күнара қозғалуда. Осындай кезекті шарада кәсіпкерлер, студент жастар, мемлекеттік және мемлекеттік емес ұйымдар мен өндіріс орындарының өкілдері бас қосты.
300 мыңнан астам халқы бар Өскемен қаласының экологиялық хал-ахуалы әлі де түрлі мәселелерді алға тартады. Оған басты себеп – Кенді Алтайдың бас қаласының, біріншіден, өндіріс орталығы болуы, екіншіден, сауда кешендерінің жылдан-жылға көбеюі, яғни жаңа ғимарат иелерінің автокөлік тұрағын жасау үшін жасыл желекке оранған орындарды жиі жоюы.
Қаланы көгалдандыру жұмыстары жүргізіліп, саябақтар мен көшелер абаттандырылғанымен, ондай мәселелердің жоспарға сай емес, керісінше, аяқастынан атқарылатыны жасырын емес. Дөңгелек үстел барысында қаланы көгалдандыру, оның экологиялық, климаттық тұрғыдағы ерекшеліктері мен жағрапиялық орналасуын да жете зерттеу қажеттігі айтылды. Сондай-ақ жылдан-жылға көбейіп отырған автокөліктерден тарайтын газдардың қоршаған ортаға тигізетін кері әсері де назардан тыс қалмады. Бұл орайда, әсіресе, жастарды экологиялық сауаттылыққа тәрбиелеу қажеттігіне баса назар аударылды.
Татьяна НЕТУНАЕВА, «Кругозор» жастар мәдениеті және туризмі орталығы директоры:
– Қаламыздың экологиялық тазалығы мен көгалдандыру мәселелері тек тиісті орындарды ғана толғандырмау керек. Керісінше жастар бойына мектептен бастап табиғатты аялауға қажетті тәрбие берілуі қажет.
Дөңгелек үстел басында айтылған әңгіме өзегі – қаланың жасыл желегін қорғап, көгалдандыру шарттарын пысықтауға, оны жүргізуін қадағалау механизмдерін жетілдіруге жұмыс тобын құруға негізделді.
Өскемен экологиясы талқыланды
Последние статьи автора