Мемлекеттік рәміздерге арналған байқау өтті

Биыл ҚР Мемлекеттік рәміздерінің қабылданғанына – 20 жыл. Осыған байланысты республикамызда жыл бойы мерейтойлық іс-шаралар өткені белгілі. Оның көпшілігі жастар мен жасөспірімдер арасында патриоттық рух беру бағытында өрбіді. Осындай шара жақында Алматы қалалық №138 қазақ гимназиясында болды.
Ертеңгі елдігімізді сақтаушы өскелең ұрпақты мемлекетшіл рухта тәрбиелеуде Қазақстан Республикасы Мемлекеттік рәміздерінің алатын орны ерекше. Сон­дықтан оны жастар мен жасөспірімдер сана­сына сіңіру әрдайым басты назарда қаралады. М.Базарбаев атындағы №138 қазақ гимназиясында өткен «Мемлекеттік рәміздер – елдігімнің белгісі» атты бай­қауда бұл барынша анық көрінді. Шараны Алматы қалалық әкімдігінің қолдауымен «Ұлттық журналистік зерттеу орталығы» қоғамдық қоры және Бостандық аудандық білім бөлімі ұйымдастырды. 8-10-сынып оқушылары арасында өткен байқауда жасөспірімдердің Мемлекеттік рәміздерге деген құрметі жиналғандар тарапынан жоғары бағаланды.
Үш кезеңді қамтыған «Мемлекеттік рәміздер – елдігімнің белгісі» атты бай­қау­дың басты мақсаты Мемлекеттік рәміздер­дің елдік пен мемлекеттіліктің басты белгісі екенін насихаттап, ұлтаралық татулық пен қатынастың негізгі факторы екенін санаға сіңіру, Мемлекеттік рәміздердің мәртебе­сін арттыруға байланысты үгіт-насихат шараларын жүргізу болып табылады. Бай­қауда шәкірт тәрбиелеудегі ұстаздардың ең­бегі де сарапқа түсті. Оқушылардың Мем­лекеттік рәміздер тақырыбында жа­зыл­ған патриоттық рух бағытындағы шы­ғар­малары мен идеялары ортаға салынып, Мемлекеттік Ту, Елтаңба, Әнұранды қалай қастерлеп, құрметтеу қажеттігі туралы ой­лары жан-жақты айтылды. Көпшілікті жас­өспірімдердің Қазақстанға деген отан­сүй­гіштік сезімдері тәнті етті.
Елбасы Нұрсұлтан Назарбаев бір сөзін­де: «Мемлекеттік рәміздер – бұл біздің мем­лекетіміздің, біздің егемендігіміздің берік негізінің бірі. Олар Тәуелсіздіктің қа­сиетті біріктіруші образын білдіреді», –  деген еді. Байқауға қатысушылар осы сөздің мә­нін ашып, оның маңызын жұрт­шылыққа кеңі­нен жеткізді. Жасөспірім­дердің Мем­ле­кеттік рәміздерді қорлауға жол бермеу керектігі жөніндегі айтқан көкейге қоным­ды пікірлері ешкімді де бейжай қалдыр­ма­ғаны анық.
«Мемлекеттік рәміздер – елдігімнің бел­гісі» байқауының қорытындысында І орынды №88 мектептің ұжымы жеңіп алып, Мемлекеттік рәміздерді қастерлеуде жоғары өреде екендіктерін танытты. Одан кейінгі орындарды №138 қазақ гимназия­сы мен №145 орта мектеп ұжымы иеленді. Жеңімпаздар ұйымдастырушылар тара­пынан тағайындалған ақшалай сыйлық­тарға ие болды.