Талдықорған қаласында келіндерге кеңес берер тағылымды шара өтті. Алматы облыстық ардагерлер кеңесі мен әкімдік бірлесіп, «Келін – отбасының болашағы» атты форум ұйымдастырды.
Бұл форумды соңғы үш жылда ұрпақ тәрбиесінде аға буын қариялардың белсенділігі мен жауапкершілігін арттыру үшін өткізілген «Әжелер – отбасының берекесі», «Атадан ұлағат» атты қариялардың облыстық жиындарының заңды жалғасы деуге болады. Арулардың ажары мен бітіміне басымдық берілетін байқаулардан мұның бір ерекшелігі – бала тәрбиесі, ата мен енені сыйлау секілді келіндік парыздың парқын ұғынуын басты ұстаным етуінде. Келіндер кеңесіне, негізінен, аудан, қалаларда өткен байқауларда үздік шыққандар қатысты. Сонымен қатар форум жұмысынан ер-азаматтар, аталар мен әжелер, жастар, жергілікті билік өкілдері, педагогтер де тыс қалған жоқ. Алдыңғы буын ата-әжелердің тәлімі мол тағылымды сөздерінен кейін келіндерге сұрақтар қойылып, олардың жауаптарын қазылар алқасы сараптады. Жүлделерге келіндермен қатар, аудан, қалалардан келген үлгілі отағалары, ата-әжелер, бойдақ қыз-жігіттер де ие болды. Форум соңында қатысушылар үндеу қабылдады.
Егеубек ДАЛБАҒАЕВ, Облыстық ардагерлер кеңесінің төрағасы:
– Елбасы Н.Ә.Назарбаев: «Бала тәрбиесін балабақшадан емес, тал бесіктен бастау керек, жаһандануға қарсы күресу емес, оған бейімделуді ойлау керек, тілімізді, дінімізді, ділімізді, әдет-ғұрпымызды сонда ғана сақтай аламыз», – деген болатын. Осыған сәйкес, Облыстық ардагерлер ұйымы «Ата-баба дәстүрі – ұрпаққа аманат» атты бағдарлама жасап, 2008 жылдан бастап барлық мектептерде сабақтан тыс тәрбие жұмыстарын өткізіп келеді. Сол шаралардың бірі – осы келіндер форумы. Бізді, қарияларды «ертең ұрпағымыз елімізге ие бола ала ма, жолымызды жалғай ма, салт-дәстүрімізді сақтай ала ма?» деген сұрақтар мазалайды. Сондықтан тентегіне тәйт дейтін, ұл мен келінге ұлағатты сөз айтатын ата мен әженің ұрпақ тәрбиесіндегі белсенділігін арттыруды мақсат етіп отырмыз.
Келіндер форумда бас қосты
Последние статьи автора