Балалар суицидке итермелейтін сайттардың белсенді қолданушысы болып барады
Оңтүстік Қазақстан облысының прокурорлары ғаламтор ресурстарын тексеру кезінде өз-өзіне қол жұмсауға итермелейтін сайттардың белсенді қолданушысы болып жүрген 300 жасөспірімді анықтады.
Прокурорлар осындай сайтқа әрбір кірушіні тексеріп, арасынан Оңтүстік Қазақстан өңірінің жастарын іздеді. Жасөспірімдердің порнографиялық қана емес, өз-өзіне қол жұмсап, өмірмен қош айтысу туралы нұсқаулар берілетін сайттарға да қызығушылық танытып жүргені анықталды.
«300 адам – түпкілікті мәлімет емес. Ондай балалар саны бұдан әлдеқайда көп болуы мүмкін. Осы қауымдастықтардың барлығы өмірмен қалай қоштасуға болатыны туралы жазады. Ал жасөспірімдер онда өз проблемалары жайында жазып, суицидті қалай жасау керек екенін сұрайды. Қарағанды облысында жасөспірімнің өмірімен қош айтысатын әр күнді санап, содан кейін көпқабатты үйдің төбесінен секіргені естеріңізде ме? Бұл оқиғадан кейін біз жұмысты күшейттік. Суицидке бейім көптеген жастар анықталды. Қазір олармен психологтар жұмыс жүргізуде», – деп баяндады ОҚО прокурорының аға көмекшісі Абзал Қыдырбаев.
Қадағалау органынан хабарлап отырғандай, қазіргі кезде прокуратураның ұсынысымен әкімдік штаттық орын бөлді. Бұл маман сайттарды күн сайын қадағалап, суицидке бейім жасөспірімдерді анықтауы тиіс.
nur.kz