Ауған соғысының ардагерлері ұрпақ тәрбиесін қолға алмақ

Туған жердің бір уыс топырағын тұмар етіп, Отан үшін от кешкен азаматтар ел мүддесі үшін бірігуі тиіс. Олар патриоттық тәрбие беру жұмысымен айналысып қана қоймай, мемлекеттік істерге де етене араласуы қажет. Ауған соғысы ардагерлері қауымдастығының жаңа басшысы, депутат Бақытбек Смағұл осындай бастама көтеріп, ұйым қызметін ары қарай жандандыруды көздеп отыр. Оның айтуынша, намысы бар әрі рухы биік азаматтар ғана шетелге қа­шып кететін сатқын ше­неу­нік­термен күресе алады.

Ауған ардагерлері аналарға құрмет көрсетті
Өткен аптада еліміздегі Ауған соғысы ардагерлерінің ұйымдары Астанада бас қосып, кезекті IV съезін өткізді. Мәжілістің ресми отырысын бастамас бұрын Ауғанда болған азаматтар тік тұрып, осы соғыста қаза тапқан сарбаздардың аналарына құр­мет көрсетті. Елордада осындай 12 от­басы бар екен. Олардың бірі – Ким отбасысы. Осы үйден Ауған соғысына аттанған жал­ғыз ұл жат жерде шейіт болған. 
Надежда КИМ, Ауған соғысында қаза тапқан сарбаздың  анасы:
– Ұлымның о дүниелік болғанына биыл 27 жыл болады. Әрине, ауыр. Ондайды ұмы­­ту қиын ғой (көзіне жас алды). Әлі есім­де, ұлым маған жиі хат жазатын. «Ау­ған же­ріндегі қышлақтарды тексеріп, дұш­ман­дар­дың бар-жоғын анықтаймын», – дей­тін. Бір күні қоршауға түсіп, өз жол­дас­тарын артынан қор­ғаймын деп, сол жер­де ерлікпен қаза болды. Бүгінгі жастар да менің ұлым сияқты батыл болса екен деп тілеймін.
Халық Қаһарманы, генерал-лейтенант Бақытжан Ертаев съезд жұмысына қатыс­қан Надежда Кимге және тағы үш анаға құ­шақ-құшақ гүлдер мен ақшалай сый-сия­паттар табыстағаннан кейін бала­сы­нан айырылған аналардың жанайқайын же­те түсінетіндігін жеткізді. «Жаңа ғана ана­лардың бірі маған жолығып: «Сол со­ғыс бізге не берді? Мен жалғыз ұлымнан айырылдым. Неге?» – деп сұрады. Әрине, бұл сауал бәрімізге қатты тиеді. Себебі 18 жастағы бозбала соғысып жатқан кезде, олар­дың құрдастары киноға барып, той­ларын өткізіп жатты. Соғысқа аттанғандар болса, аман қайта ма, жоқ па, ешқайсысы білген жоқ. Біздің аналарымыз бен жұ­байларымыз болса, көршінің баласына қарап, «балам аман қайтсын» деп мешітте құран оқытты. Шыны керек, Ауған соғысы деген кезде жүрегіміз қан жылайды. Ауған алауы мәңгілік жадымызда қалады. Әттең, біз аналарымыздың жан жарасын жаза алмаймыз...», – дейді Б.Ертаев. Осы орайда гене­рал сол соғыстың бір шындығын ашып берді. «Иә, ол өзге халықтың жерінде бол­ған соғыс. Бірақ біз, ең алдымен, сол жер­дің тарихын сыйладық, дініне құрмет та­ныт­тық. Сол үшін олар да бізге басқаша қа­ра­ды. Бүгінде ауғандықтар «шурави» атау­лыны үлкен құрметпен еске алады. Се­бебі біз бейбіт халықты өлтіріп, Құранды тап­тап, өртеген жоқпыз. Біздің кезімізде есірт­кі олай тараған жоқ. Қазір болса, мың­даған коалициялық күштерге қара­мас­тан, Ауған жеріндегі жағдай тынышта­ла­тын емес», – дейді Б.Ертаев мырза.
Жаңа басшы Ауған соғысы ардагерлерінің мәртебесін көтеруді көздейді
Съезд аясында Ауған соғысы арда­герле­рінің ұйымдары қауымдастығының жаңа төрағасы сайланды. Ұйым тізгінін ҚР Парламент Мәжілісінің депутаты Бақытбек Смағұл өз қолына алды. Оның кандидату­расын қауымдастықтың бұрынғы төрағасы, Халық Қаһарманы әрі халық қалаулысы, генерал-лейтенант Бақытжан Ертаев ұсын­ды. Содан болар, оның төрағалығын бар­лық делегаттар бірауыздан қолдады.
Б.Ер­таев­тың өзі болса, Қазақстанның Ар­да­герлер ұйымдары үйлестіру кеңесінің бас­шысы болып ауысуына байланысты қыз­метінен босатылды. Енді ол еліміздегі бар­лық ардагерлер қауымы атынан сөз сөй­лейтін болады. Дегенмен генерал Б.Ер­та­ев Ауған соғысы ардагерлерін ұмытпай, олардың мүддесін барынша қорғауға уәде беріп отыр. «Кейбір азаматтар сұрайды: «Сіз бізді тастап кетіп бара жатырсыз ба?» деп. Жоқ! Мен Қазақстанның Ардагерлер ұйымдары үйлестіру кеңесінің төрағасы ретінде де, Ауған соғысы ардагерлерінің абы­ройын көтеру үшін де жұмыс істейтін бо­ла­мын. Ал Ауған соғысы ардагерлері қа­­уым­дастығының тізгінін Бақытбек бауы­ры­­ма тапсырып отырмын. Бұл оңай тірлік емес. Мен болсам, әрқашан сіздердің қас­та­рыңнан табылатын боламын», – деген сөзімен Б.Ертаев мырза Қазақстанның А­у­ған соғысы ардагерлері қауымдастығының байрағын жаңа төрағаға салтанатты түрде табыс етті. Б.Смағұл ұйымның ақ жалауын қабыл алып, тізерлеп тұрып бірнеше рет сүйді. Өз қызметінде ол Ауған соғысында қаза тапқан жауынгерлердің отбасыларына және мүгедек болып қалған сарбаздарға көмектесіп, осы соғыста хабар-ошарсыз кет­кендерді (Ауған соғысында 18 қазақ­стандық жауынгер жоғалып кеткен) іздеп,  қазіргі жастарды патриоттық рухта тәрбие­леу жұмыстарына негізгі басымдық бере­мін дейді. Сондай-ақ жаңа басшы Ауған со­ғысы ардагерлерінің мәртебесін анық­тай­тын заңды өз мойнына алып отыр.  
Бақытбек СМАҒҰЛ, Ауған соғысы ардагерлері қауымдастығының төрағасы, Парламент Мәжілісінің депутаты:
– Бүгінде тәрбие жұмысының тізгіні біздің қолымызда болуы керек. Бүгінде ақша ұрлап, шет мемлекетке қашып, сырт­тан топырақ шашып жүрген азаматтар бар ғой. Оларды тұсаулау үшін Ауған соғысы ардагерлері жоғары жақта отыруы қажет. Біз кезінде туған жеріміздің бір уыс топы­ра­ғын мойнымызға тұмар ғып кеткенбіз. Ал әлгіндейлер болса, сыртта бой тасалап жүр. Бұл – қызғаныш емес, бұл – күйініш. Тәр­бие атаулының бізде болу қажеттігін біл­дірсе керек. Барлық Ауған соғысы арда­герлері бірігіп, жұмыс істеулері қажет. Өкі­нішке қарай, біздің арамызда ары-бері тар­татындар бар. Оған қарамай, біз бір мақ­саттың аясында топтасуымыз қажет. Бүгін­гі жас ұрпақ бізге қарап өсуі тиіс.