Абзалы – ауырмайтын жол іздеу

«Еврей дәрігерге ауырмай тұрып барады, орыс ауырғанда барады, қазақ құлағанда барады» деген әзілдің шындығы бар екеніне ешкім шүбә келтірмес. Өйткені біздің халық «Ауырып ем іздегенше, ауырмайтын жол ізде» деген қағиданы білсе де, өкінішке қарай, ескере бермейді. Салдарынан ауру асқынады. Сонан соң ғана дәрігерге барады. Ал асқынған дертті емдеп жазу да оңайға соқпайтыны белгілі. Сондықтан ҚР Президенті Іс басқармасы медицина орталығының клиникалық ауруханасы – Совминнің 1-соматика бөлімі дәрігерлері аурудың алдын алуға шақырады.
Соматика бөлімі жайлы көпшілік біле бер­меуі мүмкін, сондықтан сөз басын сома­тика бөлімі қандай бөлім деген сауалға жауап беруден бастасақ. 1-сома­тика бөлімі мең­ге­ру­шісінің міндетін атқа­рушы Зәуре Ғалым­қы­зының айтуынша, сома­тика бөлімі – бұл стационарды алмас­тыру көмегі орталығы, яғни ауруханаға жатқанға дейінгі кезеңдегі жаңа жұмыс формасы, емделушінің сапалы және толыққанды диагностикалық тексеруден өтіп және толық тәуліктік ауруханаға жатып ем­делу қажет болмаған жағдайлардағы ем­делу мүмкіндігі. Стационарлық базада диаг­нос­тика жасау, емдеу мен алдын алу шара­ла­рының жеке бағдарламалары жетілдіріледі және қажетті дәрі-дәрмектер таңдап алынып, ем тағайындалады. Жүргі­зіл­ген тексеруден кейін толықтай дәрігерлік қорытынды жаса­лады. Диагностикалау курсы, аурудың алдын алу және емдеу шара­лары арнайы жаб­дық­тал­ған емдік палаталарда жүргізіледі.
Зәуре КЕЗДІКБАЕВА, 1-соматика бөлімі мең­герушісінің міндетін атқарушы, жо­ғар­ғы санатты дәрігер:
– Бөлімшеде алдын алу шара­ла­ры­мен қатар, кардиологиялық, пуль­мо­но­ло­гиялық, гастроэнтерологиялық, неф­ро­логия­лық, жүйкелік және басқа да ауру­лары, әсіресе үйлескен пато­ло­гия­сы бар науқас­тарға ем де жасалады. Емделушілер заманауи жабдықтарды (компьютерлік және магнитті-резо­нанс­тық томографияны және т.б. мүм­кін болатын зерттеулерді) пайдалана отырып, диагностикалық зерттеу әдіс­те­рінің 500-ге тарта түріне қол жет­кізеді. Бөлімшеде коронарлық син­дром­ды жіті бақылау тестілерімен миокард инфарктісін анықтай немесе ерекшелей отырып, ишемиялық жүрек ауруының қазіргі заманғы диаг­нос­ти­касы мен адек­ват­тық терапиясы жүр­гі­зі­леді. Жүрек кеміс­тігінің дәрежесі неме­се қаупі жайын­дағы мәселені шешу үшін жүрек пептидтері зерде­ле­неді. Сондай-ақ соматика бөлімінің қыз­меті вирустық гепатиттерді диаг­нос­тикалау және емдеу ПЦТ-диаг­нос­ти­касы, соның ішінде емдеу мөлшері мен мерзімін таңдауда маңызды болып табылатын сандық тестілерге негізделген. Мүмкін бола­тын материалдардың (қан, несеп, қақырық және т.б.) бактериялық зерт­теулері 1-3 тәулік ішінде қазіргі заманғы ана­ли­за­торда 50-дей анти­био­тикке сезім­тал­дықты анықтай оты­рып жүргізіледі. Гельминттерге сандық тестілермен эхинококктан бастап токсокараны анықтау диагностикасы үлкен қызығушылық тудырады. 1-со­ма­тика бөлімі кез келген ауруларды, сондай-ақ созылмалы шаршағандық болған кезде жоғары білікті меди­ци­на­лық көмек ала алатын ком­му­ни­ка­ция­ның, тұрмысты ақпараттандыру мен ұйым­дастырудың ең заманауи құрал­дарымен жабдықталған. Емделушілерге арналған палаталар «люкс» класындағы бір және екі бөлмеден тұрады. Барлық ем ең соңғы стандарт бойынша жаса­ла­ды.
ҚР Президенті Іс басқар­ма­сы медицина орталығының клиникалық ауру­ханасы – Совминнің 1-соматика бөлі­мінің емдік палаталары теледидар, жайлы кереуеттер, медициналық қызметкерлерді шақыруға арналған арнайы түйме­ше­ле­р­мен жабдық­тал­ған. «Консультанттардың кеңесі қажет болған жағдайда олар емде­лу­шінің палатасына келеді. Сондай-ақ емханадағы медициналық аппараттардан тексеруден өткенде, оларды жеке медбике ертіп жүреді және соматика бөлімінде ем алушылар кезек күтпейді» дейді бөлім мамандары. 1-соматика бөлімінде ем алу­шы­лар тамақты тапсырыспен алдыруына болады екен. Алайда дәрігерлер рұқсат еткен тағамдарды, белгіленген диетаны ескере отырып тапсырыс беру қажет екенін де бөлім мамандары тілге тиек етті.
Совминнің 1-соматика бөлімін аралап көргенімізде, ауруханада емес, санаторийде жүргендей күйде болдық. Жұмсақ жиһаз­дар­мен, кең де жайлы кереуетпен, жеке сани­тарлық-гигиеналық бөлмелермен жаб­дықталған палаталар көзге қуаныш сыйлайды. Қорыта айтқанда, аурудың алдын алуға, емделуге барлық жағдай жасал­ған. Аурудың алдын алуға ниетіңіз болса, денсаулығыңызды толықтай Совмин дәрігерлеріне сеніп тапсы­руыңызға бола­ды. Айтылған жайттардың растығына Сов­мин ауруханасының 1-соматика бөліміне барып, өзіңіз де көз жеткізе аласыз.