Жарас Сәрсек

Жарас Сәрсек 1968 жылы 15 мамырда Алматы облысы, Ұйғыр ауданы, Сүмбе ауылында дүниеге келген. 1995 жылы Қазақ мемлекеттік университетінің журналистика факультетін бітірген. 1990–1992 жылдары жастардың «Өркен» газетінде тілші, 1992–1994 жылдары «Жас Қазақ» газетінде бөлім бастығы болып істеді. 1996–2000 жылдары «Парасат» журналында тілші, бөлім бастығы, 2000–2002 жылдары Алматы облыстық «Жетісу» газетінде журналист, 2001–2003 жылдары Қазақстан Жазушылар одағы басқармасында поэзия жөніндегі әдеби кеңесші, 2003–2005 жылдары «Әдебиет айдыны» газетінде Бас редактордың бірінші орынбасары, 2005–2008 жылдары «Заң газетінде» Бас редактордың бірінші орынбасары болып қызмет еткен. Қазір «Үркер» журналы бас редакторының орынбасары.
Тырнақалды туындылары республикалық басылымдарда 1990 жылдардан жарық көре бастаған. Өлеңдері «Толқыннан толқын туады», «Жас ақындар антологиясы» сияқты ұжымдық жыр жинақтарына енген. Бірнеше республикалық жыр мүшәйраларының жүлдегері.
«Керуен көшіп барады», «Жүрегімнің ішіндегі жүрегім», «Қастерлім», «Түнемел» атты жыр жинақтары жарық көрген. «Қастерлім» жыр жинағы үшін 2008 жылы Халықаралық «Алаш» әдеби сыйлығын алған. 2007 жылы Македония Республикасында өткен дүниежүзілік түркі ақындары фестивалінің лауреаты.