Серік Нығметұлы Ахметов

Серік Нығметұлы Ахметов 1958 жылы 25 маусымда Қарағанды облысында дүниеге келген. Қарағанды металлургиялық комбинатының жанындағы ЖТОО-ны, Ресей Басқару Академиясының аспирантурасын тәмамдаған. Мамандығы бойынша инженер-металлург, экономика ғылымының докторы.
Еңбек жолын Қарағанды металлургиялық комбинатында бастады. 1983 жылдан 1990 жылға дейін партия және комсомол органдарында жұмыс істеді, Қарағанды облыстық комсомол комитетінің бірінші хатшысы болды. 1993-1995 жылдар аралығында кәсіпкерлік қызметпен айналысты, Қарметкомбинаттың сыртқы-экономикалық байланыстар бөлімін басқарды, «Кең-Дала» Орталық-Қазақстандық тауар биржасының президенті болды. 2001 жылдан бастап Теміртау қаласының әкімі, содан кейін Астана қаласы әкімінің бірінші орынбасары, ҚР Президенті Әкімшілігінің ұйымдастыру-бақылау жұмысы және кадр саясаты басқармасы Мемлекеттік инспекциясының меңгерушісі, Қазақстанның кәсіпкерлер мен жұмыс берушілерінің «Атамекен» Одағының басқарма төрағасы, ҚР көлік және коммуникациялар министрі, ҚР Премьер-Министрінің орынбасары болып жұмыс істеді. 2009 жылдың қарашасынан – Қарағанды облысының әкімі. 2012 жылдың қаңтарынан – ҚР Премьер-Министрдің бірінші орынбасары. 2012 жылдың 24 қыркүйегінен бастап – ҚР Премьер-Министрі. 2014 жылдың 3 сәуірінен бастап – Қазақстан Республикасының Қорғаныс министрі.
«Құрмет», «Парасат» ордендерімен, «Ерен еңбегі үшін» медалімен, мерейтойлық медальдармен марапатталған.