Ләзиза Аймашева

Ләзиза Аймашева 1932 жыл 8 наурызда Жамбыл облысы Қордай ауданы Қаракемер ауылында дүниеге келген. Диктор, мәдениет қайраткері. Қазақтың тұңғыш тележүргiзушi қызы
Алматы Мемлекеттік медицина институтын (1955), Абай атындағы ҚазПИ-ді (1968), КСРО Мемлекеттік кино Жоғары режиссерлік курсын бітірген. Еңбек жолын дәріханада провизорлықтан бастап, аптеканың бөлім меңгерушісі, аптека меңгерушісі. 1959 жылы конкурстық негізде Қазақ телевизиясына дикторлық қызметке ауысты.
1964 ж. жоғары категориялы диктор, 1970 жылы жоғары дәрежелі режиссер атақтарына ие болды.
1971 жылы музыкалық хабарлар редакциясының бас режиссері, кино және бағдарламалар алмасу редакциясынын бас режиссері, 1977 жылы Қазақ теледидарының көркемдік жетекшісі, 1991 жылы "Қазақстан" РТРК АҚ-ның көркемдік жетекшісі, "ТАҢ" телерадиокомпаниясының президенті.
Аймашеваның шығарма галереясында Қазақ теледидарының "Алтын қорына" енген 2-дүниежүзілік соғыстын аяқталуынын 20 жылдығына арналған 20 сериялы деректі фильм, "Батырдың Алтын Жұлдызы", "Маңғышлақ" атты фильмдер бар. "Кино туралы әңгіме", "Киносаяхат клубы", "Кино, уақыт, замандас", "Табиғат және біз" сияқты циклдік хабарлардың режиссері болды.
Дикторлардың тұтастай бір легін (Лэскер Сейітов, Мәриям Айымбетова, Қажы Қорғанов, Тыныс Өтебаев, Всеволод Иванов, Алефтина Попова, Лидия Тюльменко, Айман Ақшалова, Жаныл Тоқпанова, Әбдірәлі Бөлебаев т.т.) тәрбиелеп шығарды. Қазақ КСР-і мәдениетінің еңбек сіңірген қызметкері, КСРО теледидарының үздігі, Қазақстан Журналистер одағы сыйлығының иегері.