Күләш Құнантайқызы Құнантаева 1931 жылы 3 наурызда Шығыс Қазақстан облысының Ұлан ауданында дүниеге келді. Қазақ мемлекеттік қыздар педагогикалық институтын бітірген.
1952-1954 жылдары - орта мектептің мұғалімі. 1954-1959 жылдары - Ленин аудандық комитеті бөлімінің меңгерушісі. 1959-1964 жылдары - БЛКЖО Орталық комитетінің хатшысы. 1964-1967 жылдары - Қазақ КСР жоғары және орта арнайы білім министрінің орынбасары. 1967-1968 жылдары - Алматы педагогикалық шет тілдер институтының проректоры. 1968-1984 жылдары - Қазақ мемлекеттік қыздар педагогикалық институтының ректоры қызметтерін атқарған. 1984 жылдан - Қазақ мемлекеттік қыздар педагогикалық университетінің профессоры, 1990 жылдан - педагогика кафедрасының меңгерушісі. Қазір Қазақстан Республикасының дербес зейнеткері.
«Пионерия Казахстана», «Воспитание учащихся на революционных и трудовых традициях», «Внеучебные объединения учащихся», «К вершинам знаний», «Развитие народного образования в Казахстане» атты кітаптарының және 170-тен аса ғылыми жарияланымдардың авторы.
Қазақ КСР Жоғарғы Кеңесінің 9-10 шақырылымындағы депутаты. Қазақстан Республикасының Ұлттық ғылым академиясының академигі, Қазақ КСР халыққа білім беру ісінің үздігі, КСРО Жоғары мектебінің үздігі, Қазақстанның еңбек сіңірген қайраткері.
Халықтар достастығы, «Құрмет Белгісі» ордендерімен, медальдарымен, «Қазақстан Республикасы ғылымының дамуына қосқан үлесі үшін» төс белгісімен марапатталған.