Арман Сқабылұлы: "Өкпелемеші" (аудио)

Өмір дегеннің өкпелетуден, соңынан өкініштен бармақты шайнаудан тұратынын түсінбейтін жаста едік қой ол кезде. Өрекпіген көңіліміз өкпешіл еді. Тай-құлындай тебісіп жүрген Табылдыны да талай өкпелеттік.

Ол да бізді өкпелеткен кездері болды. Бір-бірімізге ренжімейтінбіз. Өкпелейтінбіз. Өкпе мен реніштің арасының зіл батпан екенін енді сезіндік-ау деймін. Сәтсіз махаббатына күйінген досымыз қыз атаулыға қырын қарап кетіп еді сол кезде. Жастықтың буымен жалғанды жалпағынан басып жүрген біздерге бәрі бір еді. Өкініштен өзегі өртенген достың жан дүниесіне үңілмедік. «Мәжнүн» болдың ғой» деп күлгеніміз де есімде. Өкпеледі. Неше күн томсырайып сөйлемей жүрді. Бір күні өзімен-өзі төбеге қарап жатып біз естімеген бір әнді бастады. Қоңыр гитараның күмбірі қандай мұңды! Сөзі қандай сырлы! «Өкпелемеші» дейді. Анау аяулы махаббатына «өкпелемеші» дейді. Көзімізге жас тұнып, егіле тыңдап отырған бізге «өкпелемеңдерші» дейді. Ән бітті. Өкпеміз жазылып, толағай досты құшақтап жатырмыз. Оның да көзінде жас...
...Аяулы дос жайында жазылған естеліктерімді «Өкпелемеші» деп атадым. Өмірге өкпелеп кетіп еді... Өкінішім сәл де болса жеңілдер дегенмін. Бүгін «Жігіттердегі» Бағлан бауырым «Өкпелемешінің» әнін жаздыртыпты. Тыңдап тағы толқыдым. Серік Жанболат досымыз да жылап отыр. Сіздер де тыңдаңыздаршы! Өкпелеріңіз жазылады. Өкпелемейікші...

Бағлан Әбдірайымов, «Жігіттер» тобының әншісі:
- Табылды Досымовтың бұл әні тапсырыспен жазылмағандықтан жүрекке тез жетті. Әнге сөз жазатын талай ақын бар. Бірақ солардың ішінен Табылдың әніндегідей: «Менен де гөрі мықтырақ немесе қалайша жігіт болайын еңсере алмасам бір мұңды...» деген мағынадағы сөздерді кездестіре алмайсыз. Соған қарап, ән мен сөздің бір біріне үйлесімділігін байқаймыз. Жалпы бұл әннің болашағы зор деп ойлаймын.
Аудио ән