Шолақайдағы оқиға: 15 жасар қызды зорлап, өлтіріп, өртеп жіберген қылмыскерге үкім шықты
Үкім кезінде судья жаға ұстатар қылмыстың жай-жапсарын баяндады, - деп хабарлайды Alashainasy.kz тілшісі Аikyn.kz-ке сілтеме жасап.
Жетісу облысының Шолақай ауылында 15 жастағы Құралай есімді қызды зорлап, өлтіріп, өртеп жіберген қылмыскер өмір бойына сотталатын болды. Жантүршігерлік қылмысты жасаған 39 жастағы Рустам Ахметовке Жетісу облысының қылмыстық істер жөніндегі мамандандырылған ауданаралық сотының судьясы Бақыт Ермаханов осындай жаза кесті.
Тергеу дерегінше, сотталушы алдымен 15 жастағы Құралайды зорлап, айуандықпен өлтірген. Оның өрімдей қыздың жүрек тұсынан үш рет пышақ салғаны анықталған. Кейін бір метр тереңдікте жер қазып, қыз баланың ұялы телефонын сындырып, мәйітті өртеп, көміп тастаған екен.
Естеріңізге сала кетейік, дүйім жұртты дүр сілкіндірген қылмыс осыдан тура алты ай бұрын болған еді. Із-түзсіз жоғалып кеткен Құралай Қисабекті бүкіл Шолақай ауылының тұрғындары жан ұшыра іздеген. Алайда тек 8 күннен кейін қыз баланың мәйіті табылған. Мүрде сол ауылдан үш жарым шақырым жерде орналасқан қылмыскердің қыстағының маңынан табылған болатын.
Айта кетсек, өмір бойына сотталған Рустам Ахметовтің бұл алғашқы жасаған қылмысы емес. Ол бұған дейін 14 жастағы жасөспіріммен жыныстық қатынасқа түсіп, оған үйленіп жазадан құтылған. Екінші қылмысында тағы да кәмелетке толмаған қыз баланы зорлап, 5 жылға сотталған болатын. Енді өмір бойына бас бостандығынан айырылған ол, жәбірленуші тараптың сұрауы бойынша 10 миллион теңге моральдық өтемақы төлеуге міндеттелді.
