Кентаудың экс-әкімі 10 жыл бас бостандығынан айырылды
25 тамызда астаналық сот Кентау қаласының бұрынғы әкімі Рашид Аюповқа қатысты үкім шығарды, - деп хабарлайды Alashainasy.kz тілшісі Zakon.kz-ке сілтеме жасап.
Астана қаласының қылмыстық істер жөніндегі мамандандырылған ауданаралық соты Рашид Аюповты ҚР Қылмыстық кодексінің 1997 жылғы өзгертулерімен 177-бап (алаяқтық), 4-бөлімі, б тармағында көзделген қылмысты жасағаны үшін кінәлі деп тану туралы үкім шығарды. Қылмыстық жауаптылыққа тартудың ескіру мерзімінің өтуіне байланысты осы бап бойынша қылмыстық жауаптылықтан босатылады.
ҚАЖЫМҰХАН МЕКЕМТАС, Судья:
– Рашид Аюпов ҚР Қылмыстық кодексінің 1997 жылғы өзгертулерімен 312 бабы, 5-бөлігі (пара беру) және 28-баптың 4-бөлігі осы бап бойынша 10 жылға бас бостандығынан айыру жазасын қауіпсіздігі орташа мекемеде өтеу тағайындалсын. ҚР Қылмыстық кодексінің 1997 жылғы өзгертулерімен 41-бап, 3-бөлігі негізінде жеті жыл мерзімге мемлекеттік қызметте лауазымдарды атқару құқығынан айыру түріндегі қосымша жаза тағайындалсын.
Рашид Аюповтан мемлекет кірісіне өндірілсін:
* 1911 теңге сомасында іс жүргізу шығыны;
* Сыбайлас жемқорлық қылмыстар нәтижесінде алынған 422 млн 800 мың теңге.
"Мұның бәрі шындыққа жанаспайды. Үкіммен мүлдем келіспеймін", - деді Рашид Аюпов сот залында.
Рашид Аюпов 1981 жылы Кентау қаласында дүниеге келген. 2022 жылдың 11 наурызында Рашид Аюпов Кентау қаласының әкімі болып тағайындалды. Бұл қызметке дейін ол Түркістан облысы әкімінің орынбасары болған.
2022 жылдың 17 қазанынан бастап Рашид Аюпов Астана қаласы бойынша Қылмыстық атқару департаментінің №64 аралас күзет мекемесінде (СИЗО) жалпы негізде қамауда. Бұл туралы тек 2023 жылдың 31 наурызында белгілі болды.
2023 жылғы 18 мамырда Сыбайлас жемқорлыққа қарсы қызмет Кентау қаласының экс-әкіміне қатысты тергеу аяқталып, қылмыстық іс материалдары шешімнің заңдылығын тексеру және одан әрі сотқа жіберу үшін Астана қаласының прокуратурасына жіберілгенін хабарлады.
Аюпов әкім болып тағайындалмай тұрып-ақ, 2022 жылдың 25 ақпанында Алматы қаласы бойынша Сыбайлас жемқорлыққа қарсы қызмет Кентау қаласының экс-әкімі Дәурен Махажановқа қатысты сотқа дейінгі тергеуді бастады. Ол 98 500 доллар пара алды деген күдікке ілінді.
2022 жылдың 13 шілдесінде Дәурен Махажанов 10 жылға бас бостандығынан айырылды.
Соңғы сағатта көп оқылған жаңалықтар осында Massaget.kz
