Ажырасқан әйелін қайтара алмаған ШҚО тұрғыны оның әпкесі мен анасын пышақтап тастады
Өскемен тұрғыны өзімен ажырасқан әйелін кері қайтару үшін оның әпкесі мен анасына пышақ жарақатын салды. Бұл туралы NUR.KZ порталы altaynews.kz сайтына сілтеме жасап хабарлайды.
45 жастағы Арбоб есімді азамат Тәжікстаннан Қазақстанға көшіп келіп, елімізде отау құрады. Ер адам егіз қыздардың әкесі атанғаннан кейін ішкілікке салынған.
Әйелі Ольга оның ішіп алып, соққыға жығатынынан әбден қиналғандықтан, Арбобпен ажырасып тынады. Арбоб әйелін тіпті перзентханадан шыққаны жаңа болса да, ұрып-соққан екен.
Балаларымен бірге анасының үйіне көшіп барған Ольганы бұрынғы күйеуі бір ай өткесін іздеп барады. Ол туыстарынан қомақты ақша алып, пәтер сатып алатынын әйеліне айту арқылы Ольганы қайтарып алғысы келген екен. Алайда анасы ер адамды қызына жолаттырмай қояды.
Бірнеше айдан кейін Ольганың әпкесі анасымен бірге Арбобтың үйіндегі тоңазытқышты алып кетпек болғанында, мас күйдегі Арбоб енесіне және әйелінің әпкесіне пышақ соққыларын жасайды.
Ол екеуінің ажырасуына енесінің кінәлі екенін айтумен болады. Ольганың анасы арпалыс кезінде полицияға хабар беріп үлгерген. Ал ашуы басылған Арбоб не істегенін түсінгеннен кейін өзіне пышақ соққысын жасайды.
Ольганың әпкесі емханада тіл тартпай кетті. Ал анасы тірі қалды. Аман қалған бұрынғы күйеуі болса сотта жауапқа тартылмақ.
